भांगरभूंय | प्रतिनिधी
युरी आलेमांवः मुख्यमंत्र्यांक खबर आशिल्ल्याचो आरोप
भांगरभूंय । प्रतिनिधी
पणजीः तेंकून तेंकून दोन विमानतळां आसल्यार एक बंद पडप निश्चीत आसा, हो उड्डाण मळा वयल्या तज्ञांचो दावो खरो थारला. मोपा दाबोळी परस बरी विमानसेवा उण्या पयशांनी दिता. प्रत्यक्षांत मोपा विमानतळ लुकसाणेंत जाल्यार दाबोळी विमानतळ फायद्यांत चल्ला. क्रोनी कॅपिटेलिस्टांक मजत करचे खातीर दाबोळी बंद उडोवपाचो सरकाराचो यत्न चल्ला, असो आरोप विरोधी पक्ष फुडारी युरी आलेमांव हांणी केला.
2022 चे तुळेंत 2023 त दाबोळी विमानतळाचेर देशी पर्यटकांचो आंकडो उणो जाला. तशेंच विमानांची संख्या लेगीत देंवल्या. ही दाबोळी विमानतळ बंद पडपाचीं बीं चिन्नां न्हय मूं, अश्या आशयाची बातमी ‘उजवाडाक हाडिल्ली. हाचेर प्रतिक्रिया
दितना युरी हांणी सांगलें, मोपा फास्ट आनी सवाय तिकेटी आशिल्लीं विमानां
मेळटात. चड पयशे मोडून लोक दाबोळे कित्याक येतलो? ते भायर दोहा वचपी
दाबोळे वयली डायरेक्ट फ्लायट मोपा गेल्या. जर हे भशेन सगळी आंतरराष्ट्रीय
विमानां मोपा गेलीं जाल्यार देशी पर्यटकांची मागणी दाबोळी खातीर देंवतली,
असो युरी हांणी युक्तिवाद केलो.
मोपा विमानतळ 148 कोटींचें लुकसाण सोंसता जाल्यार दाबोळी 48 कोटी जोडून
फायद्यांत आयलां. मोपान विमानतळ वापरपाचें शुल्क उणें केलां. लोकसभा
वेचणुकेंचेर दोळो दवरून दाबोळीक भिवपाची गरज ना अशें मुख्यमंत्री म्हणटा, पूण दाबोळी 100 टक्के बंद पडटलो, हें मुख्यमंत्र्यांकय खबर आसा, असो
आरोप युरी हांणी केला. आपूण पयलीं एक पायलट. पायलट ह्या नात्यान आपूण सांगपाक सोदतां, तेंकून तेंकून दोन विमानतळां आसप हें फायद्याचें जावपाक शकना. संवसारांतल्या खंयच्याय कोनशाक अशे विमानतळ तिगपाक शकनात, अशी सुचोवणी आंतरराष्ट्रीय नागरी उड्डाण संघटणेन केल्या, अशें युरी हांणी सांगलें.
दोन विमानतळां तेंकून चलनातः युरी
एका कुशीक दुसरो विमानतळ येवपाच्यो गजाली भारतांत घडल्यात. मुंबय नवो विमानतळ आयले उपरांत जुहू विमानतळ बंद पडलो. बंगऴुरू आनी दिल्लींत लेगीत दोन विमानतळां आयले उपरांत एका विमानतळाक आपलें शटर देंवोवचें पडलें, अशें युरी आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
