भांगरभूंय | प्रतिनिधी
‘दाबोळे’ देशी प्रवाश्यांचो उणाव, विदेशी प्रवाशांचो आंकडो धादोसकायेचो
भांगरभूंय । समीप नार्वेंकार
पणजी : मोपा विमानतळाक लागून दाबोळी विमानतळ बंद पडत म्हूण भिरांत पातळ्ळ्या. हे फांटभुंयेर दाबोळी विमानतळाचेर देशी प्रवाश्यांच्यो आकडो ल्हव- ल्हव कमी जातना दिसता. डिसेंबर 2022 त दाबोळे येवपी प्रवाश्यांचो आकडो 8,23,190 आशिल्लो. आता एका वर्सा उपरांत तो आंकडो डिसेंबर 2023 त 5,55,900 चेर पावला, राज्याच्या उड्डाण मंत्रालयान दिल्ली आंकडेवारी हें सांगता. ते प्रमाण फक्त ‘विदेशी पर्यटकां’नीच दाबोळी विमानतळांक भेट दिवप पसंद केलां आनी ह्या वर्सा हो आंकडो वाडला. अर्थांत देशी पर्यटक तांचे परस संख्येन चड आसात.
बरेचश्या विमान कंपन्यांनी आपलो गाडो दाबोळेवेल्यान मोपा हालयला. मोपा विमानतळ हाडून सरकारान दाबोळी विमानतळाचेर हावळ हाडल्या आनी दाबोळी बंद उडोवप हो सरकाराचोच कट, असो फारपेट विरोधक करतात. पुण दोनय विमानतळ चालुच उरतले. भिवपाची गरज ना, अशें सरकार सांगता. ह्या सगळ्या कोफुसावांत देशी पर्यटकांची मागणी दाबोळे विमानतळा खातीर देंवल्या. 2022 त एकुण प्रवाश्यांची संख्या 73,22,167 आशिल्ली. ती आतां उणी जावन 2023 त 69,55,313 इतली जाल्या.
दुसरे वटेन दाबोळेक भेट दिवपी विदेशी पर्यटकांत वाड जाल्या. 2022 त 3,31,614 पर्यटकांनी दाबोळे विमानतळांक भेट दिल्ली आनी 2023 त पर्यटकांचो आंकडो वाडून 4,81,913 इतले मेरेन पावला. जानेराच्या 2022 त फक्त 16,108 विदेशी पर्यटकां सयत दाबोळी विमानतळ पडंग पडिल्लो. पुण ह्या आंकड्यात सुदारणा जावन जानेराच्या 2023 तो वट्ट 68,742 इतले मेरेन पावलो. पुण डिसेंबर 2023 त मात्शें गणित हाल्ले आनी हो आंकडो देवन 41,483 मेरेन पावला. पुण एकंदरीत आंकडो धादोसकायेचो आसा.
2022 त दाबोळेक भेट दिवपी प्रवासी
देशी- 73,22,167
विदेशी- 3,31,614
विमानां- 53,509
2023 त दाबोळेंक भेट दिवपी प्रवासी
देशी- 69,55,313
विदेशी- 4,81,913
विमानां- 48,195
प्रवाश्यांची तांक मोपा परस दाबोळे चडच
मोपा विमानतळ नवीनच आसा आनी तातुंत प्रवाश्यांची वाड जावपांक वेळ लागतलो हें सभाविकच. 2023 त दाबोळे प्रवासी हाताळणी करपां बाबतीत मोपा परस फुडें आसप ही अजापाची गजाल न्हय. 2023 च्या पुराय वर्सांत दाबोळे विमानतळाचेर 69,55,313 देशी जाल्यार 4,81,913 विदेशी पर्यटकांनी भेट दिली. जाल्यार मोपा विमानतळाचेर 36,63,843 देशी जाल्यार 44,253 विदेशी पर्यटकांनी भेट दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
