भांगरभूंय | प्रतिनिधी
खबरां संस्था
अहमदाबादः भारत- ऑस्ट्रेलिया हाचे मदली वर्ल्ड कप फायनल सुरू जावचे पयलीं भारतीय हवाई दलाच्या सूर्य किरण पंगडान नरेंद्र मोदी स्टेडियमचारे हवाई कवायत करतना भारताचो तिरंगो दाखयलो. मॅचीचो टॉस 1.35 वरांचेर जालो उपरांत 1.50 वरां जाय मरेन ऍर शो चल्लो.
टॉस उडयतगीर भारतीय हवाई दलाच्या सूर्य किरण विमानांनी मोदी स्टेडियमा वल्यान उड्डाणां केली. तातूंत सूर्य किरण एरोबेटीक पंगडांतल्या वट्ट 9 विमानांनी वांटो घेतिल्लो. तातूंत हॉक एमके-132 आनी किरण एमके11 विमानां आशिल्लीं. विमानांनी ह्या वेळार मळबांत तिरंग्याच्या तीन रंगांचो धुंवोर सोडलो. वेगवेगळ्या फॉर्मेशनांत ह्या विमानांनी काळजाची निशाणी लेगीत तयार केली. सूर्य किरण पंगड ऍर शो दोन सत्रांत करता. पयल्या सत्रांत सगळी विमानां मेळून एक वांगडा फॉर्मेशन तयार करतात आनी दुसऱ्या सत्रांत सगळीं विमानां वेगवेगळ्या पंगडा वरवी मळबांत तरेकवार कवायती करतात आनी फॉर्मेशन तयार करतात. ह्या वेळार तांची गती दरेका वरांक 150 तें 650 किलोमीटर इतली आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
