‘मोदी की गॅरेंटी’चें ‘इंडिया शायनिंग’ जावचें न्हय

भांगरभूंय | प्रतिनिधी

एक गजाल मुखेलपणान फुडें येता, ती म्हळ्यार भाजपान समाजाचेर अशी कितें तरी जादू केल्या वा आबे दा फारियाच्या संमोहन तंत्राचो वापर ह्या समाजाचेर केला की भाजप कितें म्हणटा, तें- तें लोकांक पटूंक लागलां.

भारत स्वतंत्र जावन 76 वर्सां आनी गोंय मुक्त जांवन 62 वर्सां पुराय जालीं. मागीर ‘देशांत आनी राज्यांत जें कितें जालां तें ह्या फाटल्या धा वर्सांतूच’ असो दावो करप कितलें योग्य? फाटल्या धा वर्सांत कितल्याश्याच मळार उदरगत जाल्या हें सामकें खरें. समाजीक, अर्थीक, भौतिक मळार कितलेशेच बदल आमकां दिसून येतात. नव्या भारताच्या नव्या सपनांची जाणीव केंद्रांतल्या प्रधानमंत्री नरेंद्र मोदी सरकाराक बरे तरेन जाल्या आनी ते खातीर देशाक फुडें व्हरपाची भक्कम दिशा देशाक फावो जाल्या हें लेगीत न्हयकारपाक जायना. पूण, जें कितें केलां तें आमीच आनी आदल्यांनी फकत देशाक लूट लूट लुटल्यात अशें म्हणप ही अतिशयोक्तीच थारता. फुडल्या लोकसभा वेंचणुकेच्या नदरेंतल्यान भाजपान आपल्या प्रचाराचो नेरेटीव्ह असोच दवरलो जाल्यार तो घडये बुमरॅंग जावपाक शकता. ‘मोदी की गॅरंटी’ हाचें ‘इंडिया शायनिंग’ जावचें न्हय, हाची जतनाय भाजपाक घेवची पडटली.
गॅरेंटीचो हुंवार,त्सुनामी
आगामी लोकसभा वेंचणुकेची घोशणा आतां खंयच्याय खिणांक जावं येता. भाजपान ‘अब की बार, चारसो पार’ असो नारो दिला, पूण मागीर तांणी हो आंकडो 370 चेर हाडून ताचो थेट संबंद जम्मू आनी काश्मिरांत रद्द केल्ल्या कलम 370 कडेन लायला. लोकसभा वेंचणुकेचे फांटभुंयेर ‘कलम – 370’ चित्रपटूय बी रिलीज जाला. ताचें प्रोमोशन व्हडा प्रमाणांत भाजपा कडल्यान सुरू आसा. ते भायर आता ‘वीर सावरकर’ हो चित्रपटूय रिलीज जावपाचो आसा. आत्ता पसुनूच टिव्हीचेर आनी समाज माध्यमांचेर ‘मोदी की गॅरेंटी’ चो मारो सुरू जाला. घरांत टिव्हीचेर, हातांतल्या मोबायलाचेर आनी गाडयेंत एफएमाचेर, वचत थंय ‘मोदी की गॅरेंटी’चो नारोच कानार पडटा. ह्या प्रचाराचो परिणामूय दिसूंक लागला. भुरग्यांच्या तोंडार आतां ही उतरां आयकुपाक मेळटात. हे फावट एक वेगळेंपण भाजपाच्या प्रचारांत दिसून येता. तें म्हळ्यार हो सगळो प्रचार आनी भाजपाची वेंचणूक रणनिती फकत एकल्याच्याच, म्हणल्यार प्रधानमंत्री नरेंद्र मोदी हांचे भोंवतणीच केंद्रीत जाल्या. काँग्रेसीच्या तेंपार ती गांधी कुटुंबा कडेन केंद्रीत जाल्ली तशी ती आतां नरेंद्र मोदी हांचे कडेन केंद्रीत जाल्या. भाजपाच्या ह्या प्रचारांत जाण्टे, नेण्टे, बायलां, भुरगीं, भलायकी, शेती, उद्योग, वेवसाय, आप रोजगार, मुळाव्यो सुविधा, शिक्षण आनी हेर सगल्या गजालींचो आसपाव हातूंत दिसता.
2014 सावन भाजप केंद्रांत सत्तेचेर आसा आनी गोंयांत तर 2012 सावन भाजपा कडेन सत्तेची चावी आसा. ह्या फाटल्या धा वर्सांत आनी गोंयांत फाटल्या 12 वर्सांत सगळी कडेन खुशालकाय पातळ्ळ्या. समाजांतले सगळे घटक समाधानी आसात. मोदीजी हांणी सगल्यांकूच समाधानी केल्यात आनी ह्या समाजांत एकूय घटक दुर्लक्षीत उरूंक ना, अशेंच दाखोवपाचो यत्न सुरू आसा. मुळांत ह्या प्रचाराक सर्वसामान्य लोकांचो खरोच प्रतिसाद मेळटलो काय तांच्या घाव्यार मीठ चोळपाचो हो यत्न अशें तांका दिसतलें, असो प्रस्न मनांत येता खरो, पूण हें इतलें सादें कारण न समजपाक भाजप मुर्ख आसा काय कितें? मागीर असो हो दावो करपाचें धाडस भाजप खंयच्या बळाचेर करता असोय युक्तीवाद जावं येता. ह्या सगल्या गजालींचो विचार केल्या उपरांत एक गजाल मुखेलपणान फुडें येता, ती म्हळ्यार भाजपान समाजाचेर अशी कितें तरी जादू केल्या वा आबे दा फारियाच्या संमोहन तंत्राचो वापर ह्या समाजाचेर केला की भाजप कितें म्हणटा तें- तें लोकांक पटूंक लागलां. लोकां कडेन संपर्क करता तेन्ना हेंच चित्र दिसता.
काँग्रेसची सावध भुमिका
गोंयच्या मळार भाजपान उत्तर गोंयची उमेदवारी सद्याचे खासदार आनी केंद्रीय राज्यमंत्री श्रीपाद नायक हांकां जाहीर केल्या. पांच फावटी ते उत्तर गोंय लोकसभा मतदारसंघांचे प्रतिनिधीत्व करतात. स फावट वेंचून आयले उपरांत गोंयांत तो विक्रम थारतलो. काँग्रेसीचो उमेदवार आजूनूय थारना. रिव्होल्यूशनरी गोवन्स पार्टीन सगल्यान पयलीं आपले दोनूय उमेदवार जाहीर करून प्रचारूय सुरू केला. उत्तरेंतल्यान मनोज परब आनी दक्षिणेंतल्यान रूबर्ट परेरा हांचो आसपाव जाता. दक्षीण गोंयची लोकसभा वेंचणूक जैतिवंत जावपाक भाजपान आपली पुराय शक्त पणाक लायल्या, पूण उमेदवारी वयल्यान मात मात्सो गोंधळ निर्माण जाला. दक्षिणेंत बायलां उमेदवारांच्या नांवांची एक वळेरी धाडात, अशें उमेदवारी निश्चित करपी संसदीय मंडळान कळीत केल्ल्यान आतां बायलां उमेदवार सोदपाची जय्यत तयारी भाजपांत सुरू आसा. भाजपाची पयली 195 उमेदवारांची वळेरी जाहीर जाली, तातूंत गोंयच्या उत्तर गोंय उमेदवाराचो आसपाव जाता. काँग्रेसीन मात आपली 39 उमेदवारांची पयली वळेरी जाहीर केल्या, तातूंत गोंयच्या उमेदवारांचो आसपाव ना. भाजप सत्तेचेर आशिल्ल्यान सहाजिकच तांचो आत्मविश्वास वाडला पूण काँग्रेस मात बरीच जतनाय घेवन उमेदवार थारायता हें स्पश्टपणान दिसता. उमेदवार जाहीर केल्या उपरांतूय बी तांची फाट धरून तांची सतावणूक करपाची शक्यताय अशिल्ल्यानूच काँग्रेसीन सावध भूमिका घेतल्या, अशें तांच्या सुत्रांकडल्यान कळटा. इतलो दरारो आनी दहशत ही पयलेच फावट पळोवंक मेळटा आनी ते खातीर निर्भय आनी मेकळेपणाच्या वातावरणांत वेंचणूक जांवप हे लोकशायेच्या नदरेंतल्यान म्हत्वाचें तें खरेंच जाता काय कितें, हें पळोवचें पडटलें.
लोकशायेंत विरोधकूय म्हत्वाचे
भारतांतल्या लोकसभा वेंचणूकीचो नियाळ घेतल्या उपरांत आता मेरेन 1984 वर्सा काँग्रेसीक 404 जागो फावो जाल्ले. आदली प्रधानमंत्री इंदिरा गांधी हांचे हत्त्ये उपरांत राजीव गांधी हांच्या फुडारपणा खाला ह्यो वेंचणुको जाल्ल्यो. 543 लोकसभेच्या जाग्यांतल्यान 404 जाग्यांचेर काँग्रेसचे उमेदवार जैतिवंत जाल्ले. पक्षाक 49.10 टक्के मतां मेळिल्लीं. ते वेळार टीडीपी हो प्रादेशीक पक्ष 30 जागे घेवन देशाच्या इतिहासांत पयलेच फावट एक प्रादेशीक पक्ष राश्ट्रीय स्तराचेर मुखेल विरोध पक्ष थारपाची घडणूकय जाल्ली. काँग्रेसीचो हो विक्रम आजूनूय शाबूत आसा. भाजपान हे फावट 400 पार असो नारो दिला खरो, पूण मागीर ते 370 चेर आयल्यात. 2014 चे वेंचणुकेंत भाजपाक 282 जाग्यांचेर जैत फावो जाल्लें आनी तांकां 31 टक्के मतां मेळिल्लीं. 2019 त हो आंकडो 303 चेर पावलो आनी मतांची टक्केवारी 37.36 टक्क्यांचेर पावली. हे फावट ती 50 टक्क्यां परस चड मेळोवपाची मोख भाजपान दवरल्या. एकी कडेन 400 पार आनी दुसरी कडेन 50 टक्क्यां परस चड मतांची टक्केवारी अशें जायत जाल्यार देशाच्या इतिहासांत पयलेच फावट एका राश्ट्रीय पक्षाची इतक्या व्हडा प्रमाणांत वेंचणुके उपरांत देशाच्या सत्तेचेर पकड फावो जातली. देशाच्या उदरगती खातीर ही गजाल फायद्याचीच पूण तेच बरोबर अशी एक हाती सत्ता एका पक्षा कडेन वचप आमच्या लोकशाये खातीर कितली सुरक्षित हेंवूय पळोवचें पडटलें. 543 लोकसभेच्या जाग्यांतल्यान 271 जागे भौमता खातीर गरजेचे. लोकशाये खातीर विरोधक हेवूय तितलेच म्हत्वाचे आनी ते खातीर विरोध पक्षूच अस्तित्वांत उरूंक ना वा सत्ताधारी पक्षाक जाब विचारपाचे ताकदीचो उरूंक ना जाल्यार लोकशाय धोक्यांत येवंक शकता, हाचेरूय विचार जावचो पडटलो.
सत्तेचेर एकहाती पकड
देशांत सध्याचे घडयेकूच भाजपान विरोधक म्हणटात ते दवरूंक नात. एकी कडेन विरोधकांचेर केंद्रीय तपास यंत्रणांची कारवाय आनी दुसरी कडेन भाजपान दाखल जावपी विरोधकांक अभय अशें सुत्रच तयार करून दवरलां. गंभीरांतले गंभीर आरोप आपूण जांचेर केल्ल्यात त्या विरोधी फुडाऱ्यांक भाजपान आपले वटेन हाडून शुद्ध केल्ल्याची कितलीशींच उदाहरणां दिवं येतात. पूण हाचो तांचेर कांयच परिणाम जायना. खंयचेय परिस्थितींत सत्तेचेर एकहाती पकड मेळोवप हें धोरण भाजपान स्विकारलां आनी ते तरेनूच ते फुडें वचत आसात हें आमकां पळोवंक मेळटा. गोंयचे बाबतीत हें आमकां स्पश्टपणान दिसता. विरोधी आमदारांक आपले वटेन हाडून पर्यायान लोकांकूय आपले वटेन वळोवपाक भाजपाक येस मेळटलें कांय कितें, हें आतां पळोवचें पडटलें. सगल्यांत चड कार्यकाळ गोंयांत सत्तेंत आसपी काँग्रेस पक्षाक भाजपान सामको पोखरून दवरला. ह्या पक्षाक आतां आपलो उमेदवार सोदपाक कळाव लागता हे वयल्यान ताचें गांभीर्य आमच्या लक्षांत येता. आतां मेरेनच्या गोंयच्या राजकी इतिहासांत सगल्यांत शक्तीमान मुख्यमंत्री म्हूण डॉ. प्रमोद सावंत हांचो आसपाव जाता. 40 तल्या 33 आमदारांचो तेंको अशिल्ल्या भाजपाक दोनूय लोकसभेचे जागे मेळूंक शकूंक ना जाल्यार ती मुख्यमंत्र्यांक लजेची गजाल थारतली आनी ते खातीर मुख्यमंत्री डॉ. सावंत हांणीय आपली पुराय राजकी ताकद पणाक लायल्या. तांचेर केंद्रीय नेतृत्वाचो दबाव स्पश्टपणान दिसूंन येता. सकाळ पसून ते राती मेरेन मुख्यमंत्र्यांच्या कार्यावळींची वळेरी पळयत जाल्यार अशें सातत्यान काम करपी मुख्यमंत्री पयलेच फावट पळोवंक मेळटा.
आतां हें फुडें लोकसभा वेंचणूक जाहीर जाल्या उपरांत ह्या सगल्या भाजप आमदारांची कितें परिस्थिती जावपाची आसा हे सांगू नज. आतां फकत प्रस्न एकूच आसा की भाजपान प्रचारांत अतिरेक करचे परस लोकांक पट्टा तेंच मांडप. जे कितें उणाव आसात ताची जाणीव करून दिवन ते फुडल्या कार्यकाळांत पुराय जातले, अशें उतर दिवप योग्य थारतलें. सगळेंच कितें तें पुराय केलां आनी आतां फुडें कांयच उरूंक ना, अशें सांगपाचो यत्न जायत जाल्यार मागीर लोक कसो ‘रिअॅक्ट’ जायत हें सांगू नजो.

किशोर नायक गांवकार
7774039242