भांगरभूंय | प्रतिनिधी
चेन्नययीन एफसीचे खेळगडे बऱ्यान वाटावले
भांगरभूंय । प्रतिनिधी
मडगांवः आयतारा एफसी गोवा आनी चेन्नययीन एफसी ह्या पंगडां मदली मॅच सोंपले उपरांत चेन्नययीन एफसी पंगडाचे चार खेळगडे प्रवास करताले, ते मोटारीचेर माड पडलो. तातूंत मोटारीचो फुडलो हारसो फुटलो, पूण बऱ्या नशिबान कोणाक कांयच जावंक ना. मेळिल्ले म्हायती प्रमाण फातोड्डेंच्या पं. जवाहरलाल नेहरू स्टेडियमाचेर आयतारा सांजे वेळार चेन्नययीन एफसी आनी एफसी गोवा ह्या पंगडा मदीं फुटबॉल मॅच आशिल्ली. मॅच सोंपले उपरांत चेन्नययीन एफसी पंगडांतल्या चार खेळगड्यांक घेवन मोटारचालक किरण कदम हो फातोड्डेंच्यान बाणावलेच्या हॉटेलांत वतालो. 9.30 वरांच्या सुमाराक मोटार मडगांवच्या रिंगरोडाचेर पावली तेन्ना अचकीत माड तांचे मोटारीचेर पडलो. मोटारचालक कदमाक माड पडटा तें दिसताच ताणें गाडी कुशीक घेवपाचो यत्न केलो. तरी लेगीत माड मोटारीच्या फुडल्या भागाचेर पडलोच. तातूंत मोटारीचो फुडलो हारसो फुटलो. मोटारचालकाचे सादुरतायेक लागून चारूय खेळगडे वाटावले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
