भांगरभूंय | प्रतिनिधी
बलिया, खबरां संस्था : उत्तरप्रदेशांतल्या बलिया जिल्ह्यांत एक अजाप करपा सारकी गजाल घडली. घरचीं वरातींत वचपा खातीर तयार जाल्ले. न्हवरोय तयार जाल्लो. मात अचकीत एक तरणाटी आयली आनी तिणें न्हवर्याचेर ऍसीड हल्लो केलो. ऍसीड उडोवपी तरणाटी त्या न्हवर्याची मोगिका आशिल्ल्याचें समजता.
बलिया जिल्ह्यांतल्या बांसडीह रोड पुलीस ठाणे हद्दींतल्या डुमरी गांवांत ही घडणूक घडली. फाटल्या दोन वर्सां सावन तरणाट्याचो एके चलये वांगडा मोग चलतालो. मात एकेच जातींतलीं आसूनय तांचें लग्न जावंक शकलें ना. तरणाट्याचें लग्न दुसरे एके चलये वांगडा जुळिल्ल्याचें कळटकच ताचे मोगिकेक तिडक मारली. तिणें लग्ना दिसा आपल्या मोगीचेर ताचे वरातींत येवन ऍसीड उडयलें. उपरांत घडणुके सुवातेर बरोच बोवाळ जालो.
मंगळारा सांजेवेळार डुमरी गांवांत ही घडणूक घडली. आपल्या मोगी कडेन लग्न जुळूंक नाशिल्ल्याच्या रागान मोगिका न्हेसून वरातीत गेली. तिणें पॉलिथीन पोतयेंत टॉयलेट नितळ करपाचें एसिड लिपोवन हाडिल्लें. जेन्ना डिजे सुरू जालो आनी सगळीं जाणां नाचपाक लागलीं. तेन्ना ते तरणाटेन आपल्या मोगीचेर म्हणल्यार त्या न्हवऱ्याचेर ऍसीड उडयलें, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
