मेल्यार चलता, उपास सोडचे नात

भांगरभूंय | प्रतिनिधी

आंगणवाडी सेविकाः उपासाक बशिल्ल्यांची भलायकी इबाडली

भांगरभूंय । प्रतिनिधी

पणजीः फाटल्या 31 दिसां सावन आझाद मैदानाचेर धरणें आंदोलन करपी तशेंच फाटल्या 10 दिसां सावन बेमुजत उपासाक बशिल्ल्या आंगणवाडी सेविकांची भलायकी पुराय इबाडल्या. शेनवारा पौर्णिमा गांवकार हे आंगणवाडी सेविकेक 108 अ‍ॅम्बुलन्सींतल्यान बांबोळेच्या गऍमेकाँत उपचारा खातीर दाखल केली. पूण सरकार कसलीच दखल घेना. मेलीं जाल्यार कोंता येता, पूण सेवेंत घे मेरेन उपास चालूच दवरतले, अशी भुमिका ह्या सेविकांनी घेतल्या.

फाटलो म्हयनोभर चालू आशिल्लें आंगणवाडी सेविकांचें आंदोलन आतां तापपाक लागलां. काँग्रेस तशेंच हेर पक्षांचो तांकां आतां तेंको मेळपाक लागला. फाटलो म्हयनोभर दीसरात आंदोलन करपी महिला सेविकांची सरकार मातूय दखल घेना. महिला बाल कल्याण खात्यान जाल्यार ह्या कर्मचाऱ्यां कडेन पुराय आडनदर केल्या. पूण आतां फाटीं सरनासतना न्याय मेळा मेरेन उपास चालूच दवरतले, अशें सेविकांनी सांगलें. दिसान दीस सेविकांची भलायकी इबाडपाक लागल्या. सरकारान आनीक कळाव केलो जाल्यार खूब जाणांक हॉस्पिटलांत दाखल करचीं पडटलीं. भाजपा सरकार सुडाचें राजकारण करता. सरकाराक सुडूच घेवपाक जाय जाल्यार आपलो घेवचो, पूण सेविकांचेर अन्याय करचो न्हय. आपले कुटुंब, ल्हान भुरग्यांक सोडून तीं आपल्या हक्का खातीर लडटात. मुख्यमंत्र्यान सुडाचें राजकारण सोडून तांकां न्याय दिवचो, अशें कामगार फुडारी अॅड. हृदयनाथ शिरोडकार हांणी सांगलें. भाजपा सरकाराक कांयच पडून गेल्लें ना. ताका लागून ह्या सर्वसामान्य लोकांचे हाल जातात. फक्त वेंचणुके पुरतीं ह्या सरकारान लोकांक फटीचीं आस्वासनां दिलीं. आतां खूबशे कामगार न्याया खातीर रस्त्याचेर देंवल्यात.

सूडाचें राजकारण करून सतावणूकः पाटकार

भलायकी मंत्री विश्वजीत राणे हे महिला बाल कल्याण मंत्री आसा. तांणी हातूंत सुडाचें राजकारण करून सेविकांची सतावणूक सुरू केल्या. हातूंत मुख्यमंत्री डॉ. प्रमोद सावंत हांणी लक्ष घालून ह्या सेविकांक ताकतिकेन सेवेंत घेवचें, अशें काँग्रेस प्रदेशाध्यक्ष अमीत पाटकार हांणी सांगलें. शेनवारा अमीत पाटकार आनी सांताक्रूझचे आमदार रुडाल्फ फर्नांडीस तशेंच हेर पदाधिकारी हांणी गोमॅकाँत वचून त्या आंगणवाडी सेविकेची वासपूस केली.