भांगरभूंय | प्रतिनिधी
साबार विभागांचे दाखले मेळूंक नात, गैरमार्गान मंजुरी दिल्ल्याचो दावो
भांगरभूंय । प्रतिनिधी
वास्कोः कुठ्ठाळी- सांकवाळ पंचायत वाठारांतल्या एका नियोजीत मेगा हावसींग प्रकल्पाक सांकवाळच्या कांय पंचा सयत थळाव्या लोकांनी विरोध केला.
35 हजार चौखण मिटर क्षश्रेत्रफळाच्या ह्या प्रकल्पांत 650 फ्लॅट, 70 व्हिला आनी पांच स्विमींग पूल बांदतले. ह्या प्रकल्पाक सांकवाळ पंचायत, मुरगांव नियोजन आनी विकास प्राधिकरणाचे दाखले मेळ्ळ्यात. पूण पर्यावरण, भलायकी, प्रदुशण नियंत्रण, वीज उदक आनी हेर संबंदीत विभागाचे दाखले मेळूंक नाशिल्ल्याचो दावो केला.
ह्या प्रकल्पाक 2007 ते 2015 ह्या काळांत थळाव्यां लोकांनी तशेंच कांय पंचांनी विरोध केल्लो. अखेर सध्याच्या पंचायत मंडळान ह्या प्रकल्पाक परवानगी दिल्या. 11 मार्चाक पंचायतीची बसका जाले उपरांत त्याच दिसा मंजुरी दिली. हे बसकेचो इतिवृत्त बरोवचे आदींच ही मंजुरू दिल्या. येता ते 22 तारखेक पंचायतीची बसका जातली.
ते बसकेचें इतिवृत्त वाचून जाले उपरांत फुडलो निर्णय घेवपाची गरज आशिल्ली. पूण सगळे नेम कुशीक दवरिल्ल्याचो दावो पंच तुळशीदास हांणी केला. ह्या प्रकरणांत तांणी प्रभारी सरपंच आनी कांय पंच वांगड्यांक लक्ष्य केल्यात. थळाव्या लोकांक विस्वासांत घेनासतना त्या प्रकल्पाक पंचायतीन मंजुरी दिवप चुकीचें आसा, अशें नायक हांणी म्हणलां.
पंच मार्वेला कार्व्हालो हांणी लेगीत ह्या प्रकरणांत कांय पंच वांगड्यांक लक्ष्य केल्यात 11 मार्चाक प्रकल्पाचो थाराव मांडप आनी त्याच दिसा मंजुरी दिवप हें खंयच्या पंचायत घटणेंत बसता, असो प्रस्न तांणी उपस्थीत केला. ह्या प्रकल्पाक आमचो विरोध आसा आनी तो प्रकल्प आमी कसोच जावपाक दिवचे नात, अशें तांणी सांगलें.
ह्या मेगा प्रकल्पाक कांय पंचांनी गैरमार्गान मंजुरी दिल्या. थंय प्रकल्प बांदपाक थळावे लोक केन्नाच मंजुरी दिवचे नात, अशें समाज वावुरपी नारायण नायक हांणी सांगलें. ह्या प्रकल्पाच्या विरोधांत गरज लागली जाल्यार न्यायालयांत दाद मागतले, अशें तांणी सांगलें.
ह्या वेळार कुठ्ठाळी काँग्रेस गट अध्यक्ष पिटर डिसोझा, पावलू सोझा, सॅबी फर्नांडीस आनी हेरांनी मेगा प्रकल्पा विशीं म्हायती दितना विरोध केलो. ह्या वेळार आदले सरपंच प्रेमानंद नायक, आदले उपसरपंच रोकोझिना वालीस, आदले पंच रॉकी वालीस, सिस्टर आनी थळावे लोक व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
