भांगरभूंय | प्रतिनिधी
लियॉनॅल मॅस्सी निवृत्त जाल्या उपरांत अर्जेंटिना राष्ट्रीय फुटबॉल पंगड ताची 10 क्रमांकाची जर्सी निवृत्त करतले. मॅसीचो भोवमान करपाक अर्जेंटिना फुटबॉल संघटनेन हो निर्णय घेतला. मॅसीन सध्या आंतरराष्ट्रीय फुटबॉल मळा वयल्यान निवृत्ती घेवंक ना.
मॅस्सीच्या फुडारपणाखाला अर्जेंटिनान पोरूं जाल्ली संवसारीक फुटबॉल सर्त जिखिल्ली. अर्जेंटिना 36 वर्सांनी वस्ताद थारिल्लो. फायनलींत ताणें फ्रान्साक पॅनल्टी शुटआवटांत हारयिल्लो.
मॅस्सी ज्या वेळार निवृत्त जातलो त्या वेळार ताची 10 क्रमांकाची जर्सी कोणाकूच घालपाची परवानगी दिवचे नात. मॅस्सीचो भोवमान म्हूण 10 क्रमांकाची जर्सी निवृत्त करतले अशें अर्जेंटिना फुटबॉल असोसिएशनाचे अध्यक्ष क्लोडियो तापियान म्हणलें.
मॅस्सी पयलीं ही जर्सी अर्जेंटिनाचो आनीक एक म्हान फुटबॉलर दिएगो माराडोना घालतालो. अर्जेंटिनान 2002त माराडोनाचो भोवमान म्हूण ही जर्सी निवृत्त करपाचो यत्न केल्लो. पूण, आंतरराष्ट्रीय फुटबॉल म्हासंघाच्या खर नेमांक लागून तशें करपाक शक्य जालें ना.
फिफाच्या नेमां प्रमाण, पंगडान 1 ते 23 क्रमांक वापरप गरजेचें आसा. अशे स्थितींत फुडारांत ह्या क्रमांकाची जर्सी घेवपाची सक्ती कोणाकूय करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
