भांगरभूंय | प्रतिनिधी
मॅन्चॅस्टर सिटीन क्लब वर्ल्ड कप सर्तीचे फायनलींत फ्लुमिनेसे क्लबाक 4-0 फरकान हारोवन अंदूं आपलो पांचवो किताब जिखलो. मॅन्चॅस्टर सिटीन फकत 40 सेकंदां भितर आघाडी घेतिल्ली. ज्युलियन अल्वारेझान हो गोल केलो. फ्लुमिनेसेचो मुखेली निनोन 27व्या मिनटाक केल्ल्या आत्मघातकी गोलाक लागून मॅन्चॅस्टर सिटीची आघाडी 2-0 अशी जाली. उपरांत फोडेनान 72व्या मिनटाक तिसरो गोल केलो.
अल्वारेजान 88व्या मिनटाक आपलो दुसरो आनी क्लबाचो चवथो गोल केलो. अशे तरेन मॅन्चॅस्टर सिटीन आपलो पयलो क्लब वर्ल्ड कप किताब जिखलो. मॅन्चॅस्टरान अंदूं एफए कप, प्रिमियर लीग, चॅम्पियन्स लीग आनी सुपर कप किताब जिखला.
पेप गुआर्डिओला ह्या जैता सयत तीन वेगळ्यावेगळ्या क्लबां वांगडा क्लब वर्ल्ड कप जिखपी प्रशिक्षक थारलो. ताणें बार्सेलोनाक 2009 आनी 2011त हो किताब मेळोवन दिल्लो. ते उपरांत 2013त बायर्न म्युनिचाक वस्ताद केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
