भांगरभूंय | प्रतिनिधी
नॉर्वेचो ग्रॅण्डमास्टर मॅग्नस कार्लसनान आनीक एक इतिहास घडयतना संवसारीक रॅपीड बुद्दीबळ सर्ती उपरांत संवसारीक ब्लिट्झ बुद्दीबळ सर्तीचो किताब आपल्या नांवार केलो. फाटले खेपे लेगीत ताणेंनूच दोनूय गटांतल्यो सर्ती जिखिल्ल्यो.
कार्लसनान 21 फेरयांचे ब्लिट्झ सर्तींत 16 गूण मेळोवन भांगरा पदक जिखलें. 21 फेरयेतले 12 डाव जिखले, आठ डाब बादाबाद दवरले, जाल्यार फकत एक हार फ्रान्साच्या मकसीम लाग्रेवा आड घेवची पडिल्ली.
कार्लसनान हाचे पयलीं 2009, 2014, 2017, 2018, 2019 आनी 2022त वस्तादपण जोडिल्लें. 15.5 गुणां सयत रशियेचो डॅनिएल डुबोवान रुप्या पदक आनी रशियेच्या आर्टेमिव ब्लादिस्लावान 15 गुणां सयत कांश्या पदक मेळयलें. भारताच्या खेळगड्यां मदीं अर्जुन एरिगासी 14 गुणां सयत सवे, अरविंद चितांबरम 13.5 गुणां सयत 14वे आनी आर प्रज्ञानंद 12.5 गुणां सयत 28वे सुवातेर उरलो.
मजगतीं, बायलांच्या गटांतली ब्लिट्झ बुद्दीबळ सर्त रशियेचे गुनिना वालेंटिनान जिखली. तिणें 14 गूण केले. हाचे पयलीं साबार खेपे किताब जिखपाच्या लागसार पावून तिका अखेरे निर्शेणेक तोंड दिवचें पडटाले. पूण, हे खेपे तिणें वस्तादपण जोडलें. स्वित्झर्लेण्डाची अलेक्झेंड्रा कोस्टेनियुक 13.5 गुणां सयत दुसरी सुवात मेळयली. कांश्या पदका खातीर जाल्ले मॅचींत हरिका द्रोणावल्लीक हार घेवची पडली. तिका चीनाचे जू जिनरान हारयली. हे हारीक लागून तिका पदक चुकलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
