भांगरभूंय | प्रतिनिधी
हारीचो क्रम कसो मोडपाचो ह्या हुस्क्त्यांत आशिल्ल्या रॉयल चॅलेंजर्स बंगळुरूक आनीक एक धपको बसला. आक्रमक बॅटींग करपाक प्रसिद्ध आशिल्लो ग्लॅन मॅक्सवॅलान अनिश्चीत काळा खातीर ब्रेक घेतला. तो परतून केन्ना येतलो हे विशीं कांयच स्पश्टताय ना.
बंगळुरू खातीर मॅक्सवॅल म्हत्वाचो खेळगडो आसा. पंगडांतलो अणभवी खेळगडो ह्या नात्यान मॅक्सवॅलाचेर व्हड जापसालदारकी आसा. बॅटिंगे वांगडा स्पिन बॉलींग आनी उत्कृश्ट फिल्डिंग ही ताची जमेची बाजू आसा. पूण, हंगाम सुरू जायत सावन मॅक्सवॅलाक म्हणपा सारकें प्रदर्शन करपाक जमूंक ना. सोमारा जाल्ले सनरायझर्स हैदराबादा आडचे लडती पयलीं मॅक्सवॅलान पंगड वेंचतना आपलो विचार करूं नाकात अशें पंगड वेवस्थापनाक सांगलें. ते उपरांत ताका पंगडांतल्यान भायर दवरलो. आपूण अनिश्चीत काळा खातीर ब्रेक घेता अशें मॅक्सवॅलान स्पश्ट केलें. मानसीक आनी शारिरीक दिश्टीन ताजो जावपाक ब्रेक घेतला अशें मॅक्सवॅलान सांगलें.
अंदूंच्या हंगामांत मॅक्सवॅलान स मॅचींतल्यान फकत 32 धांवड्यो केल्यात. बॉलर म्हणून ताणें मात्शी आपली उपयुक्तताय दाखयल्या. पूण, बॅटिंगेंत अपेशी थारिल्ल्यान पंगडा मुखा वयली अचडण वाडली.
2020त लेगीत मॅक्सवॅलाक धांवड्यो करपाक अपेस आयिल्लें. त्या वेळार पंजाब किंग्सा वतीन खेळटना मॅक्सवॅलान 11 मॅचींनी 108 धांवड्यो करप शक्य जाल्ल्यो. आक्रमक बॅटींग करपाक प्रसिद्ध आशिल्ल्या मॅक्सवॅलाक त्या वर्सा एक सको लेगीत मारपाक जमूंक नाशिल्लो.
35 वर्सां पिरायेचो मॅक्सवॅल ऑस्ट्रेलिये वतीन सात टॅस्टी, 138 वन डे आनी 106 टी-20 मॅची खेळ्ळा. आयपीएलांत ताणें 130 मॅचींनी खेळटना 156.40चे स्ट्रायक रेटीन 2751 धांवड्यो केल्यात. हातूंत 18 अर्द शेंकड्यांचो आस्पाव आसा. तशेंच ताणें 35 विकेटी लेगीत घेतल्यात. मॅक्सवॅल आयपीएलांत अजून मेरेन दिल्ली कॅपिटल्स, मुंबय इंडियन्स, पंजाब किंग्स आनी रॉयल चॅलेंजर्स बंगळुरू वतीन खेळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
