भांगरभूंय | प्रतिनिधी
ग्लॅन मॅक्सवॅलान आनीक जबरदस्त प्रदर्शन करून ऑस्ट्रेलियेक उमळशीक वाडोवपी जैत मेळोवन दिलें. ताच्या आक्रमक नाबाद शेंकड्याच्या नेटार ऑस्ट्रेलिया पंगडान पांच टी-20 मॅचींचे तिसरे मॅचींत भारताक 5 विकेटींनी हारयलो. ह्या जैतान ऑस्ट्रेलियान माळेंतली आस्त कायम राखली. भारतान सुरवातीच्यो दोनूय मॅची जिखून 2-0 अशी आघाडी घेतिल्ली. आयची मॅच जिखून माळ जिखपाचो ताचो यत्न आसलो. पूण, मॅक्सवॅलान ताचो हो यत्न फुकट घालयलो. ताणें 48 बॉलांनी नाबाद 104 धांवड्यो केल्यो. हातूंत आठ चवक्यांचो आनी आठ सक्यांचो आस्पाव आशिल्लो. मुखेली मॅथ्यू वेडान 16 बॉलांनी नाबाद 28 धांवड्यो केल्यो. ट्रॅव्हिस हेडान 18 बॉलांनी 35 धांवड्यो केल्यो.
भारतान पयलीं बॅटींग करतना 3 विकेटी वगडावन 222 धांवड्यो केल्ल्यो, ऑस्ट्रेलियेन 5 विकेटी वगडावन 225 धांवड्यो करून जैत जोडलें. ऑस्ट्रेलियेन निमाण्या दोन ओव्हरींनी 43 धांवड्यो केल्यो.
ऑस्ट्रेलियेच्या जैतान ऋतुराज गायकवाडाची नाबाद 123 धांवड्यांची खेळी फुकट गेली.
ते पयलीं 24 धांवड्यांचेर 2 विकेटी पडल्या उपरांत मुखेली सुर्यकुमार यादवा वांगडा मेळून ऋतुराजान डाव सांबाळ्ळो. सुर्यकुमार यादवान 29 बॉलांनी पांच चवके आनी दोन सक्यांचे मजतीन 39 धांवड्यो केल्यो. बाद जावचे पयलीं ताणें ऋतुराजा वांगडा मेळून 57 धांवड्यांची भागिदारी केली. ते उपरांत ऋतुराजान जबरदस्त बॅटींग केली. ताचे खेरीत तिलक वर्मान नाबाद 31 धांवड्यो केल्यो. दोगांयनी मेळून 59 बॉलांनी 141 धांवड्यांची भागिदारी करीत भारताचो स्कोर 222 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
