भांगरभूंय | प्रतिनिधी
जुझे फिलीप डिसोझाः कॅ. विरियातो फर्नांडीस हांची मुरगांवां प्रचार भोंवडी
भांगरभूंय । प्रतिनिधी
मुरगांवः मुरगांव बंदरांतलो खण वेवसाय बंद करून लोकांचे भलायकेक धोको निर्माण करपी कोळसो हाताळणी सुरू करपी भाजप सरकार आसा. कोळशाच्या प्रदुशणान मुरगांव, वास्को वाठारांतल्या लोकांचे भलायकेक धोको निर्माण जाला. ताका थळावे लोकप्रतिनिधी जापसालदार आसात. मुरगांवचे आदले आमदार बंदरांतल्या कोळशाक खर विरोध करताले, उपरांत अचकीत हो आमदार भाजपांत गेलो आनी कोळसो नियंत्रणांत हाडपाची भास उलोवपाक लागलो. अश्या आमदाराक लोक योग्य वेळार बुद्द शिकयतले. वास्को मतदारसंघ फाटल्या 15 वर्सां सावन उदरगती पासून पयस उरला. हाका पुराय तरेन भाजपा सरकार आनी थळावो आमदार जापसालदार आसा, अशें राष्ट्रवादी काँग्रेस शरद पवार गटाचे गोंय मुखेली तशेंच आदले महसूल मंत्री जुझे फिलीप डिसोझा हांणी सांगलें.
इंडी आघाडीचे दक्षीण गोंयचे काँग्रेस उमेदवार कॅप्टन विरियातो फर्नांडीस हांणी बिरेस्तारा 18 एप्रीलाक वास्को- मुरगांवां प्रचार भोंवडी जाली. त्या वेळार तांचे वांगडा राष्ट्रवादी काँग्रेस शरद पवार गटाचे गोंय मुखेली तशेंच आदले महसूल मंत्री जुझे फिलीप डिसोझा, गोंय कांग्रेस अल्पसंख्यांक विभागाचे मुखेली नियाजी शेख, आदले उपनगराध्यक्ष काशिनाथ यादव, आदले नगराध्यक्ष उलारिको रॉड्रिगीस, आदली नगरसेविका तारा केरकार, अमीन मुल्ला, गोंय प्रदेश काँग्रेसीचे हेर मागासवर्गीय अध्यक्ष नितीन चोपडेंकार आनी हेर काँग्रेस कार्यकर्ते हाजीर आशिल्ले.
सुरवेक विरियातो आनी हेरांनी वास्कोचें ग्रामदैवत दामोदर देवाचें दर्शन घेतलें. ते उपरांत वास्को टॅक्सी स्टॅण्डा वयल्या साईबाबा मंदिरांत देवाचें दर्शन घेतलें. ह्या वेळार कॅ. विरियातो हांणी मुरगांव पालिकेच्या मॉडर्न मार्केटांत, भाजी मार्केटांत आनी वास्को नुस्त्यां मार्केटांत वचून वेवसायिकांची भेट घेतली.
भाजप सरकारान जीएसटीच्या माध्यमांतल्यान ल्हान वेवसायिकांक अर्थीक संकश्टांत घातल्यात. मोदी सरकार उद्देगपतींचो आशिल्ल्यान हें सरकार सर्वसामान्यांचें केन्नाच जावपाक शकना. वास्को नुस्त्यां मार्केट आपलो प्रकल्प आशिल्लो, पूण भाजप सरकारान आपल्या प्रकल्पांक केन्नाच प्राधान्य दिवंक ना. तशेंच वास्को मुंडवेलचें प्रशासकीय इमारतीचें बांदकाम लेगीत भाजप सरकारान आडावन दवरलें, असो आरोप जुझे फिलीप डिसोझा हांणी केलो. भाजप सरकार अल्पसंख्यांचें नाशिल्ल्याचो आरोप आदले उपनगराध्यक्ष काशिनाथ यादव हांणी केलो. ह्या सरकारान सदांच मध्यमवर्गियांक उदरगत आनी येवजणे पासून पयस दवरिल्ल्याचोय दावो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
