भांगरभूंय | प्रतिनिधी
वास्को, प्रतिनिधी: मुरगांव बंदरांतलो धको नंबर धा आनी इकराच्या खासगीकरणाक आमचो विरोध आसा. खासगीकरण केलें, जाल्यार आमच्या वेवसायांचेर व्हड परिणाम जावपाचो भंय आसा. खाजगीकरणाक मुरगांव बंदर प्राधिकरण अनुकूल आशिल्ल्यान, आमचे आड वातावरण निर्मिती करतात. आमकां लक्ष्य करपाचें नियोजन करून डाव खेळटा असो आरोप हँडलिंग एजंट असोसिएनशन, ट्रान्स्पोर्ट असोसिएशन, लेबर कान्ट्रक्टरस्, टिप्पर ट्रक ओनर्स असोसिएशनाच्या प्रतिनिधींनी मंगळारा घेतिल्ले पत्रकार परिशदेंत केलो. मुरगांव बदरांतल्या संबंदीत धक्क्यांचें खासगीकरण केल्यार आमचे मुखार आंदोलना बगर हेर पर्याय उरचो ना, अशें तांणी सांगलें.
भवानी शिपिंगाचे एस. पी. त्रिपाठी, नितीन पालकर, वेंकटेश्वरम् ट्रॉन्स्पोटर्सचे वासिम शेख, मुरगांव टिप्पर ट्रक मालक संघटनेचे अध्यक्ष हेमंत शेटगांवकार, सुचन भोसले, मजुर कंत्राटदार योगेश पाटील, अमित टॉन्स्पोर्टरचे राजन भोसले, रॉड्रिग्ज असोसिएशनाचे मिल्टन रॉड्रिग्ज आनी हेर प्रतिनिधी हाजीर आशिल्ले.
मुरगाव बंदरांतल्या त्या धक्यांचें खासगीकरण जावचे खातीर एका स्टिव्हडोरला मुरगांव बंदर प्राधिकरणाचें कांय अधिकारी मजत करतात. मुरगाव बंदर प्राधिकरणान सत परिस्थिती जनते मुखार दवरपाची गरज आशिल्ल्याचें तांणी सांगलें.
एस पी. त्रिपाठी हांणी, धको नंबर धा आनी इकराचेर सगळे तरेच्यो सुविधा उपलब्ध आसात. ताका लागून ह्या धक्क्या पसून मुरगांव बंदर प्राधिकरणाक बरो महसूल मेळटा. ह्या धक्याचेर शेकड्यांनी कुटुंबांचें पोट चलता. ताका लागून ह्या धक्याचे खासगीकरण कित्याक करतात हें कळना. धको नंबर णवाची परिस्थिती सामकी वायट आसा, त्या धक्याचें खासगीकरण करचें अशी आमची मागणी आसा.
मुरगांव बंदरात एका स्टिव्हडोर्सची जी मक्तेदारी चल्ल्या ती बंद जावपाची गरज आसा. आमच्यो ज्यो आडखळी आसात, समस्या आसात, त्यो पयस करपा खातीर मुरगांवचे आमदार संकल्प आमोणकार आमकां मजत करतात. तें चित्र पिड्ड्यार करपाचो यत्न कांय जाण करतात. आमी मुरगांव बंदरांतल्या जिप्समची येरादारी करतात. आमी जिप्समची चडांतचड येरादारी योग्य सुवातेर केली. तशेंच संबंधितां कडल्यान आमकां फाटल्या कांय म्हयन्यां सावन येरादारी खातीर निर्धारीत पयशे मेळूंक ना. ताका लागून आमी कांय प्रमाणांत उरिल्ली जिप्समची येरादारी बंद दवरिल्ली. आमच्या कामगारांक पगार दिवपा खातीर आमचे कडेन पयशे नाशिल्ल्यान आमकां हो निर्णय घेवचो पडिल्लो. तशेंच सत्य परिस्थिती जनते मुखार हाडिनासतना आमचे विशीं गैरसमज समाजांत पातळटा असो दावो शेख हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
