भांगरभूंय | प्रतिनिधी
प्रदुशणाचो चड त्रास आपल्या प्रभागात: दामोदर नायक
वास्को: आमी कोळसो प्रदुशणाच्या विरोधांत आसा. प्रदुशण बंद जावंकूच जाय असो सूर मुरगांव पालिका मंडळाचे बसकेंत मंगळारा आयकूंक आयलो. समाजीक कार्यकर्ते कोळसो प्रदुशणा आड आवाज काडीत आसतना मुरगांव पालिका मंडळाची प्रदुशणाची भुमिका कितें आसा हें वास्कोकारांक कळूंक जाय अशेंय कांय नगरसेवकांनी म्हणलें. प्रदुशणाच्या प्रस्नांचेर सगले नगरसेवक, नगरसेविका आनी नागरिकांनी एकठांय येवपाची गरज उक्तायतना आमदाराकूय लक्ष्य केलें. हे बसकेंत मरिना प्रकल्पाक विरोध करपा संबंदी थाराव घेतलो. तशेंच हांगासरल्या घरांचें पुनर्मुल्यांकन सर्वेक्षण, हेडगीं गोरवां आनी हेर विशयांचेर चर्चा जाली.
मुरगांवचे नगराध्यक्ष गिरीश बोरकार, उपनगराध्यक्ष रामचंद्र कामत, मुख्याधिकारी दीपेश प्रियोळकार तशेंच हेर नगरसेवक, नगरसेविका, अधिकारी हे बसकेक हाजीर आशिल्ले. हे बसकेंत कोळसो प्रदुशणाचेर नेटाची चर्चा जाली. कोळसो प्रदुशणाक लागून मुरगांव मतदारसंघांतल्या लोकांक अदीक त्रास सोंसचो पडटा. हे संबंदी कसलीय तरी उपाय येवजण करपाची गरज उक्तायली. आमी कोणाच्याय वेवसाया आड ना. तांणी वेवसाय करचो. पूण कोळशाचें प्रदुशण जावचें ना हाचे कडेनूय लक्ष दिवपाची गरज आशिल्ल्याचें कांय नगरसेवकांनी सांगलें.
बसके उपरांत नगराध्यक्ष गिरीश बोरकार हांणी म्हणलें, मरिना प्रकल्पाक विरोधी करपा संबंदी एका पंचायतीचें पत्र आयिल्लें. ते प्रमाण आमी मरिनाक विरोध करपाचो निर्णय घेतला. तशेंच कोळसो प्रदुशण आनी हेडगीं गोरवा हे संबंदीय चर्चा केली. घरांच्या पुनर्मुल्यांकना संबंदीय लोकांनीय योग्य तें सहकार्य करपाची गरज आसा.
नगरसेवक दामोदर नायक हांणी कोळसो प्रदुशणाचो सगल्यांत चड त्रास आपल्या प्रभागांतल्या लोकांक जायत आशिल्ल्याचो दावो केलो. जेटी, रुमडावाडो बी वाठारांनी कोळश्यांचे भुकटीक लागून लोकांच्या भलायकीचेर मोटो परिणाम जायत आसा. कोळसो प्रदुशण प्रकरणांत समाजीक कार्यकर्ते आनी हेर आवाज काडीत आसात. पूण मुरगांव पालिका कांयच उलयनाशिल्ल्याचें दिसून येता.
कोळसो प्रदुशणाक लागून लोकांचे भलायकेचेर परिणाम जायत आसतना आमी दोळे बंद करून बसचें काय कितें असो प्रस्न नायक हांणी विचारलो. मुरगांव बंदरांतल्यान जावपी येरादारी लोकां खातीर घातक थारूंक लागल्या. ते संबंदी कसलीय तरी उपाय येवजण करपाची गरज तांणी उक्तायली. घरांचें पुनर्मुल्यांकन करतात. तांचे कडल्यान घरपट्टी बी घेतात. फक्त कर एकठांय करपा खातीर मुरगांव पालिका आसा? लोकांक भलायकी विशीं सेवाय दिवप गरजेचें आशिल्ल्याचें दामोदर नायक हांणी म्हणलें.
नगरसेवक फ्रेड्रिक्स हेन्रिक्स हांणीय कोळसो प्रदुशणाचेर आवाज काडलो. आमी कोळसो हाताळणी बंद जावची अशें म्हणिनात. पूण हाताळणी योग्य तरेन जावची, जेणे करून प्रदुशण जावचें ना अशें तांणी म्हणलें.
नगरसेवक यतीन कामुर्लेकार हांणीय कोळसो प्रदुशणाक लागून लोकांचेर कसो परिणाम जाता हे संबंदी तांणी आपले आवयचें उदाहरण दिलें.
ह्या वेळार मातियस मोंतिरो हांणीय खारीवाड्यार बॉक्सायट हाताळणीक लागून लोकांक कसो त्रास जाता हे संबंदी म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
