मुरगांव पालिका मंडळाचे बसकेंत वेगळ्यावेगळ्या विशयांचेर चर्चा

भांगरभूंय | प्रतिनिधी

32 विशया बदला 17 विशयांचेर चर्चा जावन घेतले थाराव

वास्को: मुरगांव पालिका मंडळाची काल (बुधवारा) बसका जावन कर्मचाऱ्यांची बडटी, रद्द जाल्लीं पदां, भुंयगत गॅस वाहिन्यो, बॅनर लावपाक बंदी, सोपो दर वाड बी विशयांचेर चर्चा जाली. ह्या वेळार कांय म्हत्वाचे थाराव घेतले. भुंयगत गॅस वाहिन्यो घालपाचें काम सद्या बंद दवरचें. संबंदीत कंपनीच्या प्रतिनिधींनी आपत्तकालीन वेवस्थापना संबंदीची म्हायती, आराखडो आदींचें सादरीकरण केलें उपरांत काम सुरू करचें असो निर्णय घेतलो. हे बसकेंत 32 विशयांचेर चर्चा जावपाची आशिल्ली. पूण सुमार 17 विशयांचेर चर्चा जाले उपरांत बसका तहकूब केली.

पालिकेची विभागीय बडटी समिती नाशिल्ल्यान कामगारांक बडटी मेळपाक अडचणी निर्माण जायत आसात. कामगारांचें अर्थीक लुकसाण जाता. ह्या कारणा खातीर सुमार 20 पदां रद्द जाल्यांत. ती परतून भरपाची गरज आसा. कामगारांक वेळार बडटी मेळटली हाचे कडेन संबंदीत अधिकाऱ्यांनी लक्ष दिवपाची गरज नगरसेवक दीपक नायक हांणी उक्तायली.

कुकींग गॅस वाहिन्या वतीन गॅस पुरवण जातली ही एक बरी गजाल. पूण त्यो गॅस वाहिन्यो घालचे पयलीं कसली खबरदारी घेतल्या हे लोकांक समजप म्हत्वाचें आसा. लोक जेन्ना आमकां विचारतात तेन्ना आमचे कडेन योग्य म्हायती नासता. ह्या प्रकरणांत संबंदीत कंपनीन कसली खबरदारी घेतल्या हे संबंदी योग्य म्हायती दिवपा खातीर सादरीकरण करपाची गरज आसा अशें तांणी म्हणलें.

वाडें तळ्याच्या दुसऱ्या टप्प्यांतल्या सोबितीकरणाचें काम रोखडेंच हातांत घेतले. पूण ह्या तळ्याच्या मालकी अधिकारा संबंदी प्रकरण न्यायालयांत प्रलंबीत आसा. ह्या प्रकरणांत पालिका वकिला कडल्यान योग्य सल्लो घेवपाचो निर्णय घेतला अशें तांणी स्पश्ट केलें.

पालिका इमारतीचे दुरुस्तीक लागून म्युनिसीपल हायस्कूल बायणांतल्या माता सेकंडरी स्कुलाच्या इमारतींत हालयिल्लें. पूण आतां पालिका इमारतीचें काम निमाण्या पांवड्यार पाविल्ल्यान जानेवारीच्या निमाण्या सप्तकांत म्युनिसीपल हायस्कुलाचे वर्ग पयली भशेन पालिका इमारतींत सुरू जातलें अशी म्हायती नगरसेवक यतीन कामुर्लेकार हांणी दिली.

शाळेचो बालरथ आसा. चालक आनी मजतनीस, डिझॅल, देखभाली खातीर वर्साक तीन लाख रुपया अनुदान मेळटा. पूण खर्च चार लाख रुपया येता. म्युनिसीपल हायस्कूल हें गोंयांतलें एकूच पालिका विद्यालय आसा. पूण मुरगांव पालिके कडल्यान कसलेंच अर्थीक सहाय्य मेळना. ताका लागून एक लाख रुपया शिक्षक आपल्या पगारांतल्यान दितात. पालिकेन निदान म्युनिसीपल हायस्कुलाक एक लाख रुपया अनुदान दिवचें अशी मागणी कामुर्लेकार हांणी केली.

पालिका वाठारांत बॅनरांक बंदी घाल्या. फुडारांत बॅनरां बदला डिजीटल जायरात करतले. ते खातीर भोंवती व्हॅन वा एक सुवात निश्चीत करतले. तो मेरेन टू बाय टू चो बॅनर लावपा खातीर दोन-तीन सुवाती सोदच्यो. थंय सगले सोपस्कार करून बॅनर लावचे अशें थारायिल्ल्याचें तांणी स्पश्ट केलें.

भुंयगत गॅह वाहिन्या संबंदी सदर कंपनीच्या प्रतिनिधिनी सादरीकरण केल्ल्याचें नगराध्यक्ष लिओ रॉड्रिगीश हांणी सांगलें. पूण तांणी आपत्तकालीन वेवस्थापना संबंदीचो आराखडो सादर करचो अशी विनंती केली. वैध हातगाडेधारकां कडल्यान तीन रुपया बदला णव रुपया सोपो कर घेवपाचो थाराव घेतलो.

शार वाठारांत सकाळीं सात ते रातचीं धा ह्या वेळांत अवजड वाहनांक प्रवेश बंदी आसा. ताका लागून जिणेगरजेचो म्हाल, बांदकाम साहित्य बी येरादारी करपी अवजड वाहनां येवंक शकनात. संबंदितांक समस्यांक तोंड दिवचें पडटा. हे खातीर त्या अवजड वाहनांक सूट दिल्ल्याचें थारायलां अशें लिओ रॉड्रिगीश हांणी म्हणलें.