भांगरभूंय | प्रतिनिधी
भांगरभूंय । प्रतिनिधी
मुरगांवः मुरगांव नगरपालिकेच्या घरपट्टींत परत 42 हजार रुपयांचो घोटाळो उक्ताडार आयला. कागदपत्रांचें टायपींग करून व्हो घोटाळो केल्या आनी तातूंत टायपींग करपी एजंट आनी पालिकेच्या प्रशासन विभागांतले कांय कर्मचाऱ्यांचो आसपाव आसा अशें पालिकेंतल्या सूत्रांनी सांगलें.
घरपट्टींत परत घोटाळो जाल्ल्यान मुख्याधिकाऱ्यान पुलीस स्टेशनांत कागाळ करची अशी मागणी संबंदितांनी केल्या. ह्या घोटाळ्यांत वास्को नवेवाडें बसस्टेशनाचे कडेन आशिल्ले इमारतींत टायपिंगाचें काम करपी एजंट घुसपला. वास्कोंतल्या एकल्यान आपल्या घरपट्टीचीं कागदपत्रां टायपिंग करपाक त्या एजंटा कडेन दिल्लीं. घर धनया कडल्यान 42 हजार रुपये घेंवन ताणे ताका घरपट्टी भरिल्ल्याचें पालिकेचें बील दिल्लें. उपरांत ताणे पालिका कार्यालयांत वचून बिलाची पडटाळणी केली तें व्हो घोटाळो उक्ताडार आयलो.
घोटाळो जाल्ल्याचें पालिकेंतल्या कागदपत्रां वयल्यान स्पश्ट जातगीर त्या एजंटान घरपट्टी म्हणून घेतिल्ले 42 हजार रुपये त्या घर धनयाक ताच्या घरा वचून परत दिले अशें
सांगलें. पालिकेचें बील त्या एजंटाक घर धनयाक दिवपा खातीर पालिकेच्या प्रशासकीय विभागांतल्या एका कर्मचाऱ्याक दिल्ल्याचेंय उक्ताडार आयले. नगराध्यक्ष गिरीश बोरकारान ह्या घोटाळ्या विशीं विचारलें तेन्ना ताणे हाची चवकशी करतले अशें सांगलें. टायपिंग एजंटा वरवी कोणेय घरपट्टी भरिल्ली आसल्यार तांणी पालिकेत येवनताची तपासणी करपाची गरज बोरकारान उक्तायली. पालिकेंत अर्थीक चणचण आसतना अशे तरेचे घोटाळे उक्ताडार आयल्यार पालिका मंडळाचें नांव इबाडपाक शकता. लोकांनी घरपट्टी, जल्म- मरणाचो दाखलो स्वता पालिकेंत येवन घेवचो आनी हेर कर पालिकेंत येवन भरचे अशें आवाहन बोरकारान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
