भांगरभूंय | प्रतिनिधी
टॅक्सीकारांनी आमदार साळकाराक भेटयलें निवेदन
वास्को, प्रतिनिधी: मुरगांव जुंव्यार येवपी क्रुजांतल्या पर्यटकांचें भाडें आमकांय मेळपाक जाय. वास्को रेल्वे स्टेशना कडल्यान कांय खाजगी बसवाले सवाय भितर प्रवाश्यांची येरादारी करतात ती बंद करची, अशी मागणी करपी निवेदन शार वाठारांतल्या टॅक्सी स्टॅण्डावेल्या टॅक्सीकारांनी वास्कोचे आमदार दाजी साळकार हांकां दिलें. हे विशीं मुख्यमंत्र्यां सयत चर्चा करून योग्य तोडगो काडटलों अशें आस्वासन साळकार हांणी दिलें.
शार वाठारांत टॅक्सीकारांक सध्या कांयच भाडें मेळनाशिल्ल्यान तांचे मुखार पोटाचो प्रस्न उबो रावला. पंदरा दिसांतल्यान एकदांच भाडें मेळटा असो दावो तांणी केला. आदीं क्रूज आयले उपरांत थंयच्या पर्यटकांची येरादारी करपाची संद सगळ्या टॅक्सीकारांक नंबरा प्रमाण मेळटाली. मात आतां तशें जायना. आतां नंबर दितात. मात आमकां भाडेंच मेळना. टॅक्सी संघटणे वतीन मुरगांव बंदरांतले पर्यटक येरादारी सोदतात. ते आपले मर्जींतल्या टॅक्सीकारांक आपोवन तांकां भाडें दितात. आमचे कडेन नंबर आसूनय आमकां भाडें दिना, असो दावो शार वाठारांतल्या टॅक्सीवाल्यांनी केला. रेंट अ कार वाल्यांक आपोवन भाडें दितात. मात आमकां कित्याक भाडें दिना? असो प्रस्न टॅक्सीकारांनी केलो.
आदीं वास्को रेल्वे स्टेशनाचेर देंवपी पर्यटक हांगाच्या हॉटेलांत रावताले. उपरांत गोंय दर्शना खातीर वास्कोचे टॅक्सीचो वापर करताले. मात आतां कांय खाजगी बसवाले त्या पर्यटकांक सवाय दरांत कळंगूटे व्हरतात. ताका लागून टॅक्सीकारां सयत हॉटेलकारांच्याय वेवसायाचेर परिणाम जाला. बायणा दर्यादेगेर आतां पर्यटक येवपाक लागल्यात. थंयूय आमकां प्रवासी भाडें मेळोवपा खातीर धांवडायतात अशें तांणी सांगलें.
हे विशीं आमदार साळकर हांची भेट घेवन टॅक्सी चालकांनी निवेदन दिलें. वास्को, मुरगांव, दाबोळी मतदार संघांच्या आमदारांची बसका घेवन तोडगो काडटले अशें साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
