मुरगांवां चार पंचायतींत अपक्ष उमेदवारांक जैत

भांगरभूंय | प्रतिनिधी

भांगरभूंय । प्रतिनिधी
मुरगांवः मुरगांव तालुक्यांतल्या सात पंचायतींतल्या चार पंचायतींन अपक्ष उमेदवारांक जैत मेळ्ळा. तीन पंचायतींन भाजपा समर्थक वेंचून आयल्यात. बोगमळो पंचायतींत आदलो सरपंच लक्ष्मण कवळेकाराक हार खावची पडली. सांकवाळ पंचायतींत दक्षीण गोंयचे भाजपा अध्यक्ष तुळशीदास नायक तिसरे फावट जैतिवंत जाल्यात. चिखले पंचायतींत आदलो उपसरपंच कमला प्रसाद आनी ताची घरकान्न सुनिता यादव जैतिवंत जाल्या.
चिखली पंचायतीचेर कमला प्रसाद हांच्या पॅनलांतले 4 उमेदवार व्हडा मताधिक्क्यान जैतिवंत जाले. कमला प्रसाद तिसरे फावट वेंचून आयिल्ल्यान ते घडये सरपंच जातले असो अदमास आसा.
केळशीच्या वॉर्ड 6त सांतान जोस मारिया दा सिल्वा आनी फिलीप लुईस दा सिल्वा हांकां सारकींच 118 मता मेळिल्ल्यान लॉटरी पद्दतीन निकाल लायलो आनी तातूंत सांतानाक नशिबान हात दिलो.