भांगरभूंय | प्रतिनिधी
मुरगांव, प्रतिनिधी : वास्को आयओसी ओल्तार इंधन टँकर आनी दुचाकी गाडयेचो अपघात जावन दुचाकी चलोवपी गंभीर जखमी जालो. राजेसाहब हजारथी हो टँकराच्या फाटल्या टायरा पोंदाक आयिल्ल्यान ताच्या उजव्या पांयाक गंभीर दुखापत जाल्या. ताका बांबोळे गोमॅकोंत उपचारा खातीर धाडला.
वास्को इंडियन ऑयल कंपनींतल्यान इंधन साठो घेवन भायर आयिल्ल्या टँकर नंबर जीए ०६ व्ही ९६६६, आयओसी कडेन ओल्त घेतना दुचाकी नंबर जीए ०६ जे ७४३४ चो टँकराक धपको बसलो. वास्को बायणाचे हजारथी हाची दुचाकी टँकरच्या फाटल्या टायराक सांपडिल्ल्यान तो गंभीर जखमी जालो. वास्को पुलिसांनी घडणुके सुवातेर वचून ताका उपचारा खातीर रोखडोच दाबोळी चिखली उपजिल्हो हॉस्पिटलांत दाखल केला. दुखापत गंभीर आशिल्ल्यान ताका फुडल्या उपचारा खातीर गोमॅकोंत धाडला.
घडणुके सुवातेर पुलिसांनी येवन पंचनामो केलो. तशेंच टँकर चालक बी ए लोकेश हाचे आड गुन्यांव दाखल केला. बारा टायरांच्या ह्या टँकराचो एक टायर अपघाता वेळार फुटलो. हो अपघात जालो तेन्ना टँकरांत क्लिनर नाशिल्लो, अशी म्हायती थंय हाजीर आशिल्ल्यांनी दिली. फुडलो तपास वास्को पुलीस हवालदार आशिष नायक करतात.
मजगतीं, वास्को आयओसी मोडणार इंधन टँकर आनी मुरगांव बंदरांतल्या जड वाहनांची येरादारी व्हडा प्रमाणांत वाडल्या. हे खातीर हांगां चोवीस वरां पुलीस दवरपाची मागणी समाजीक कार्यकर्ते शंकर पोळजी हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
