भांगरभूंय | प्रतिनिधी
वास्को : मुरगांव बंदर अधिकारिणीच्या वालंकिणी कॉपेला लागसार जमनीची मेरावणी (डिमार्केशन) केली तेन्ना थळाव्यांनी ताका विरोध केल्ल्यान ताण निर्माण जालो. हे विशीं मुरगांवचे आमदार संकल्प आमोणकार हांकां म्हायती मेळटांच तांणी हे सुवातेर येवन मेरावणी प्रक्रिया स्थगीत करपाची मागणी केली. कॉपेलाच्या एक इंजचे लेगीत सुवातेकूय हात लावपाक दिवचे ना अशी शिटकावणी आमदार आमोणकार हांणी दिली.
वालंकिणी कॉपेल वाठारांत जमनीची मेरावणी करपा खातीर एमपीएचे अधिकारी आयिल्ले. हाची म्हायती मेळटांच पॅरिश प्रिस्ट फादर झेवियर ब्रागांझा हांचे सयत व्हडा संख्येन थळावे हांगा एकठांय आयले. तांणी जमनीची मेरावणी करपाक विरोध केलो. मेरावणी करपाक दिवचे ना अशी शिटकावणी दिवन थळावे हांगा बसून रावले.
हाचे उपरांत हे विशींची म्हायती मुरगांवचे आमदार संकल्प आमोणकार हांकां मेळ्ळी. तांणी रोखडीच धांव घेवन एमपीएच्या अधिकार्यांकडेन चर्चा केली. तांचे कडल्यान म्हायती घेतले उपरांत मेरावणेची प्रक्रिया स्थगीत करपाची मागणी केली आनी कॉपेलाच्या एक इंच सुवातेकूय हात लावपाक दिवचे ना अशी शिटकावणी दिली.
जमनीची मेरावणी करपा खातीर आयिल्ल्या एमपीएच्या अधिकार्यांक आडायिल्ल्यान, थंय ताणाचें वातावरण निर्माण जालां. हाका लागून हांगा पुलीसूय आयले. थळाव्यांनी कॉपेल वाठाराच्या संरक्षणा खातीर एकवट दाखोवन प्रशासनाचे कारवाये आड तिडक उक्तायली. हांगा पुलीस बंदोबस्त दवरलो, हे पुराय घडणुकेचेर पुलीस आनी प्रशासन लक्ष दवरून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
