मुख्यमंत्र्यांनी म्हापशें अर्बन बँकेच्यो फायलीं बिनधास्त उक्त्यो करच्यो

भांगरभूंय | प्रतिनिधी

-रमाकांत खलपः सांखळेंत काँग्रेसचे जाहीर सभेंत आव्हान

दिवचलः म्हापशें अर्बन बँक स्थापन केले उपरांत हे बँकेंतल्यान रीण दितना आमी सगले तरेची जतनाय घेतिल्ली. योग्य सुरक्षा हमी घेवनूच रिणां दिल्यात. सगले वेव्हार कायदेशीर आसात. ताका लागून म्हापशें अर्बन बँक प्रकरणांत आपणाचेर फाटल्यान आरोप करचे न्हय, मुखार येवचे. आपूण उक्त्या माचयेर हे विशीं चर्चा करपाक तयार आसात. मुख्यमंत्र्यांनी बिनधास्त फायलीं उक्त्यो करच्यो. ‘खलप कोणाक भियेना’ अशें रमाकांत खलप हांणी सांखळेंतल्यान काँग्रेस सभेंत स्पश्ट केले.

सांखळे प्रचार सभेक माचयेर काँग्रेस प्रदेशाध्यक्ष अमीत पाटकार, महाराष्ट्रांतले फुडारी संभाजीराव मोहिते, शिवसेनेच राज्य मुखेली जितेश कामत, आपचे राजेश कळंगूटकार, गोवा फॉरवर्डाचे संतोषकुमार सावंत, नगरसेवक प्रवीण ब्लेगन, आदले आमदार प्रताप गांवस, सदानंद मळीक, आदले नगराध्यक्ष धर्मेश सगलानी, राजेश सावळ, सुनिता वेरेंकार, सांखळेचे गटाध्यक्ष मंगलदास नायक, दिवचलचे गटाध्यक्ष मनोज नायक, मयेंचे गटाध्यक्ष बाबी च्यारी आनी हेर मानेस्त हजर आशिल्ले.

बँल सुरू करतना आपूण सगली जतनाय घेतली. मगो पक्षांत आसतना भाजप पक्ष हालींच गोंयांत धडपडटालो. त्या वेळार भाजपाचे आमदार वेंचून येवचे हे खातीर आपूण यत्न केल्यात. आयचे खासदार श्रीपाद नायक हांकां मडकय मतदारसंघांतल्यान वेंचून हाडपा खातीर ज्येश्ठ फुडारी लालकृष्ण अडवाणी हांचे सयत आपूणूय प्रचार केलो. गोंयांत भाजपाक आपल्या पक्षाचो विरोध आसतनाय साथ दिली. आयज तेच आपल्या विरोधांत उलयतात. अशें ह्या वेळार रमाकांत खलप हांणी म्हणलें.

काँग्रेसची ही सभा सुरू आसतनाच ‘ला तारा‘ सभाघरा भायल्यान प्रचार करपी भाजपाच्या कार्यकर्त्यांनी आपल्या पक्षाच्यो घोशणा दिल्यो. ह्या कृत्याचेर काँग्रेस प्रदेशाध्यक्ष अमीत पाटकार हांणी टिका केल्या. 15 लाख रुपया दरेकल्याच्या खात्याचेर येतले ताचे कितें जाले, गोंयाक विशेश दर्जा दिवपाच्या घोशणेचे कितें जाले, तशेंच 2024 त केंद्रांत भाजप सरकार स्थापन जाले उपरांत तीन म्हयन्यांत खणी सुरू करपाच्या घोशणेचे कितें जाले अशें जायते प्रस्न तांणी उपस्थीत केले.

राम मंदिराच्या प्राणप्रतिश्ठा सुवाळ्यांत देशाच्यो राष्ट्रपती द्रौपदी मुर्मू हांकां त्यो फकत आदिवासी समाजांतल्यो आशिल्ल्यान आपोवणें धाडूंक ना. अशा प्रकारान जाती आनी धर्माच्या आदारान राजकारण करपी भाजपाचो खरो चेरो सगल्यां मुखार आयला. हे खेपे लोक तांकां घरा बसोवन धडो शिकयतले, अशें महाराष्ट्राचे फुडारी संभाजीराव मोहिते हांणी सांगलें.

ह्या वेळार प्रवीण ब्लेगन, मेघश्याम राऊत, आदले आमदार प्रताप गांवस, सदानंद मळीक, वाळपयच्याे काँग्रेस फुडारी मनिशा उसगांवकार, आपचे राजेश कळंगुटकर, गोवा फॉरवर्डचे संतोषकुमार सावंत, शिवसेनेचे जितेश कामत हांचीय भाशणां जालीं. सांखळेचे गटाध्यक्ष मंगलदास नावक हांणी सगल्यांक येवकार दिलो, जाल्यार सूत्रसंचालन अंकुश कामत हांणी केले.