भांगरभूंय | प्रतिनिधी
दिवचल: राजकारणांत आनी समाजकारणांत सेगीत व्यस्त आशिल्ले मुख्यमंत्री डॉ. प्रमोद सावंत हांणी थोडो वेळ काडून सोमारा सकाळीं आपल्या घरा कडेन कार्यकर्ते, भुरगीं आनी कुटुंबां सयत होळये निमतान रंगोत्सवाची मजा घेतली. ह्या वेळार तांणी खूबशा जाणांक रंग लावन होळयेच्यो शुभेत्सा दिल्यो. कार्यकर्त्यांनी डॉ. सावंत हांकां रंग लावन होळयेची परब मनयली.
वेंचणुकेंत भारतीय जनता पक्षाक जैतिवंत करपाक सगले एकवटान तयार जाल्यात. रंगोत्सवाच्या माध्यमांतल्यान आगळो वेगळो आनंद लुटपाची संद गोंयकारांक मेळ्ळ्या. तेच बरोबर जबाबदारीचें भान दवरून दरेकान गोंयच्या विकासांत आपलें योगदान दितना प्रधानमंत्री नरेंद्र मोदी हांचे हात घटमूट करपा खातीर भाजपाच्या दोनूय उमेदवारांक जैतिवंत करपाचें आवाहन मुख्यमंत्री डॉ. प्रमोद सावंत हांणी केलें.
नारी शक्तीक गोंयांत तशेंच देश पांवड्यार पुराय संद दिल्या. हाका लागून बायलां खातीर पक्ष आतां सावनूच आरक्षणाचे दिशेन वाटचाल करपाक सक्षम जाल्ल्याचें हें एक उदाहरण आशिल्ल्याचें डॉ. सावंत हांणी सांगलें. तशेंच तांणी होळी आनी रंगपंचमीच्यो समेस्त गोंयकारांक आनी देशवासियांक शुभेत्सा दिल्यो.
विरोधक कितें उलयतात हाका आमचे नदरेन म्हत्व ना. आमी आमचें जनसेवेचें कार्य चालूच दवरलां. ताका लागून आतां विरोधक कितें म्हणटात हो मुद्दोच उरिल्लो ना. आमची नेटाची वाटचाल सुरू जाल्या आनी आमकां आतां कोणूच आडावंक शकना. संघटण कुशळटाय, पक्षाची रणनिती अशे खूबशे उपक्रम हाका लागून सेगाीत लोकां कडेन पक्षाचें नातें घटमूट जायत आसा अशेंय मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
