भांगरभूंय | प्रतिनिधी
मुख्यमंत्र्यां सयत नव्या खासदारांची फाल्यां जातली बसका
पणजी, प्रतिनिधी : लोकसभा वेंचणुकेच्या निकाला उपरांत मुख्यमंत्री डॉ. प्रमोद सावंत आनी खासदार श्रीपाद नायक हे आयज रातचे म्हत्वाचे बसके खातीर पयलेच फावट दिल्लीक वतले. मुख्यमंत्र्यां सयत नव्या खासदारांची फाल्यां शुक्रारा सकाळीं दिल्लीक बसका जातली.
भाजप प्रणीत राष्ट्रीय लोकशाय आघाडी वतीन सरकार स्थापन करपाच्यो हालचाली नेटान सुरू आसात. हे बसकेंत भाजप संसदीय मंडळाच्या फुडार्यांच्या पदार नरेंद्र मोदी हांची निवड जातली. प्रधानमंत्री नरेंद्र मोदी हांची सोपूत विधी ९ जुनाक जावपाची शक्यताय आसा. सोपूत विधीची तारीख मात आजूनय नश्चिीत जावंक ना.
श्रीपाद नायक हे उत्तर गोंयांत सेगीत स फावटीं वेंचून आयल्यात. ते कायम भाजप सरकारांत मंत्री म्हणून आसात. ज्येश्ठ खासदार आशिल्ल्यान हे खेपोय तांचो मंत्रिमंडळांत आसपाव निश्चीत आसा. मुख्यमंत्री डॉ. सावंत हांची केंद्रीय फुडार्यां सयत मंत्रिपदा विशीं चर्चा जातली अशे संकेत आसात. आजय मेरेन श्रीपाद नायक हांकां राज्यमंत्रिपदाचेरूच समाधान मानचें पडलां. ह्या वेळार तांकां कॅबिनेट मंत्रीपदार बढती मेळपाची शक्यताय आसा. अशें जरी आसलें तरे घटक पक्षांक कितलीं मंत्रीपदां दिवचीं पडटलीं, हाचेरूच सगळें थारतलें. सगळ्यांत पयलीं १९९९ वर्सा वेंचून आयले उपरांत स. अटलबिहारी वाजपेयी सरकारांत ते राज्यमंत्री आशिल्ले. उपरांत नरेंद्र मोदी हांच्या नेतृत्वाखाला दोनूय कार्यकाळांत ते राज्यमंत्री आशिल्ले.
पक्षान दक्षीण गोंयची सुवात जिकूंक नाशिल्ल्यान पक्षाक कांय प्रमाणांत धपको सोंसचो पडला. हे फाटभूंयेर मुख्यमंत्री आनी नव्या खासदारांच्या दिल्ली भेटी विशीं बरीच उत्सुकताय निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
