भांगरभूंय | प्रतिनिधी
पणजी, बातमीदार ः दिल्लीचे मुख्यमंत्री अरविंद केजरीवाल हांकां सर्वोच्च न्यायालयान जामीन दिल्ल्यान भाजपा फुडारी बेजारल्यात. राज्यांतल्या कांय भाजपाच्या अधिकाऱ्यांनीय हास्यास्पद प्रतिक्रिया दिल्या. हुकूमशाय वा सालाझारशाय ती केन्ना ना केन्ना सोंपता. हें कळिल्ल्यान भाजपा फुडाऱ्यां मदीं अस्वस्थताय पातळ्ळ्या, अशी टिका इंडी आघाडेचे एक फुडारी, आपाचे गोंय मुखेल अमित पालेकार हांणी उक्तायल्या.
आयज पणजेंत जाल्ले पत्रकार परिशदेंत ते उलयताले. ह्या वेळार वाल्मीकी नायक, डॉ. विभास प्रभुदेसाय आनी हेर अधिकारी हाजीर आशिल्ले.
सर्वोच्च न्यायालयाचो निर्णय म्हळ्यार सत्याचें जैत. हो एक इतिहासीक निर्णय. सादारणपणान मनशाक जाल्ली अटक ही बेकायदेशीर आसा अशें कळ्ळे उपरांतच न्यायालयान असो निर्णय दिता. विरोधी फुडाऱ्यांक जामीन मेळप कठीण जावचें म्हणून मनी लॉन्ड्रिंग कायद्यांत बदल करचो अशें भाजपान सुचयल्लें. अशें आसून लेगीत न्यायालयान केजरीवाल हांकां जामीन मंजूर केलो. न्यायालयान हो निर्णय दितना कायद्याचो जे पद्धतीन अर्थ काडला तें पळयल्यार भाजपान कायदो हातांत घेतला हें स्पश्ट जाता अशें पालेकार हांणी सांगलें.
केजरीवाल हांकां जामीन मेळिल्ल्यान भाजपाचे फुडारी बेजारल्यात. घडये तांकां कोर्टाचें काम कशें चलता तें कळना. भाजपा हो एक भ्रश्टाचारी पक्ष. तांकां आपल्या कर्माचें फळ भोगचें पडटलें. तांच्या फुडाऱ्यांकय रोखडेंच वा फुडें बंदखणींत वच्चें पडटलें असो दावोय पालेकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
