भांगरभूंय | प्रतिनिधी
मुख्यमंत्रीः पांच वर्सांतल्या कामाचें समाधान आशिल्ल्याचो दावो
भांगरभूंय । प्रतिनिधी
दिवचलः जेन्ना सामान्य कार्यकर्तो मुख्यमंत्री जाता तेन्ना सर्वसामान्य लोकांच्यो भावना खऱ्या अर्थान समजूंक शकता. मुख्यमंत्रीपद हें मिरोवपा खातीर नासून जनसेवे खातीर आसा, अशें मुख्यमंत्री डॉ. प्रमोद सावंत हांणी सांगलें.
सांखळी मतदारसंघांत जिल्हो पंचायत निधींतल्यान एक कोटी रुपयांचे उदरगतीच्या कामांचो शुभारंभ मुख्यमंत्री डॉ. सावंत हांचे हस्तुकीं जालो. ह्या वेळार ते उलयताले. तांचे वांगडा जिल्हो पंचायत अध्यक्ष सिद्धेश नायक, गोपाळ सुर्लकार, रश्मी देसाय, आनंद काणेकार, विश्रांती सुर्लीकार, कृष्णा गांवस हाजीर आशिल्ले.
पांच वर्सां पुराय करपाचो अणभव आगळोच. खूबश्या मळांचेर येस मेळटा, हाचें समाधान आसा. पयल्या दोन वर्सांत ‘भिवपाची गरज ना’ ही घोशणा आयज टॅक लायन थारल्या. प्रधानमंत्री नरेंद्र मोदी हांच्या फुडारपणा खाला पांच वर्सां मुख्यमंत्रीपदाची जापसालदारकी सांबाळटना लोकांचे प्रस्न सुटावे करपाक जाले, हाचें समाधान आसा, अशें मुख्यमंत्र्यान स्पश्ट केलें.
गोंयांत सेगीत पांच वर्सां मुख्यमंत्री म्हूण वावर करतना खूबशे अणभव आयले. सुरवातीच्या काळांत कोरोनाक लागून खूबशीं आव्हानां स्विकरचीं पडलीं. ताचेर जैत मेळयतना स्वयंपूर्ण गोंयची घोशणा दिली. खूबशे नवे बदल हाडले. प्रशासन, अनुशासन आनी एकदंर सगळ्याच मळांचेर आयज बदल दिसून येतात. देशांत घटमूट सुरक्षा आशिल्लें मोदी हांचें फुडारपण तशेंच गोंयांत पुराय भोवमताचें सरकार हाका लागून डबल इंजिनान गोंयांत मुळाव्या आनी मानवी उदरगतींत व्हड उड्डाण घेतलें. ताचे सकारात्मक परिणाम मुखार आयले. खूबश्या मळांचेर उदरगतीक चालना मेळ्ळी. सगळ्या घटकांक आस्पावन घेवपाचो वावर करपाक मेळ्ळो, हें व्हड समाधान आसा, अशें मुख्यमंत्र्यान सांगलें.
परतून एकदां देशांत भाजपाचें सरकार स्थापन जातलें. प्रधानमंत्री मोदी देशाचें फुडारपण करतले. गोंयच्यो दोनूय सुवातो भाजपा जिखतलो, असो विस्वास मुख्यमंत्र्यान उक्तायलो. आयज मेरेन मुख्यमंत्री म्हूण केल्ल्या कामाचें निश्चीत समाधान आसा. गोंयाक अजून वयर तेंगशेर पावपाचें आसा. सगळयांच्या आदारान हो वावर फुडें व्हरपाचो आसा, अशेंय तांणी स्पश्ट केलें. आदलें काँग्रेस सरकार हे घोटाळे करपा खातीर फामाद आशिल्लें. आतां भाजपा सरकारान उदरगतीचो ध्यास घेतला. देश, राज्य आनी दरेका गांवा खातीर उदरगतीक चालना दिवन नवी क्रांती घडोवपा खातीर भाजपा सरकार वावुरता, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
