भांगरभूंय | प्रतिनिधी
इंडियन सुपर लिगेचे (आयएसएल) मॅचवीक 9ची सुरवात एफसी गोवा आनी मुंबय सिटी ह्या कट्टर प्रतिस्पर्धीचे लडतीन जातली.
मुंबय फुटबॉल एरेनांत जावपी हे मॅचींत गोलांचो पावस पडपाची शक्यताय आसा. मुंबय सिटी आनी एफसी गोवा हे परंपरीक प्रतिस्पर्धी म्हूण प्रसिद्ध आसात. 2018-19 आनी 2020-21चे आयएसएल प्ले ऑफाचे लडतींत हाची प्रचिती आयल्या. दोनूय पंगडां मदीं आतां मेरेन 20 मॅची जाल्यात. तातूंत दोनूय पंगडांनी दरेकी सात मॅची जिखल्यात, जाल्यार उरिल्ल्यो स मॅची बादाबाद उरल्यात.
मुंबय सिटी आनी एफसी गोवा ह्या पंगडां मदले मॅचींतलें खाशेलपण म्हणल्यार गोलांचो पावस. आतां मेरेन एकामेका आड खेळिल्ल्या 20 मॅचींनी दरेकी 63 गोल पडल्यात.
अंदूंचे सुरवातीचे आठ मॅचींनी मुंबय सिटीन 23 गोल केल्यात. आयएएलाचे सुरवातीच्या पांवड्यार इतके गोल करपाचो हो आयएसएलांतलो विक्रम आसा. ताणें एफसी गोवाचो विक्रम मोडलो. एफसी गोवान 2018-19च्या हंगामांत 22 गोल केल्ले. त्या हंगामांत एफसी गोवान उपांत्य फेरयेंतले मॅचींत मुंबय सिटीक हारयिल्लो.
अंदूंच्या हंगामांतलें मुंबय सिटीच्या गोलांचें खाशेलपण म्हणल्यार. एका परस चड मॅच विनर आसात. फाटले मॅचींत नॉर्थ इस्ट युनायटेडा आड मिडफिल्डर अहमद जाहून पयलो गोल केल्लो. मोरॉक्को मुंबय सिटी वतीन गोल करपी 11वो खेळगडो आसा.
मुंबय सिटीच्या प्रदर्शनांत सातत्य आसा, जाल्यार दुसरे वटेन एफसी गोवान आपल्या प्रदर्शनांत सुदारणां केल्या, पूण तातूंत सातत्य ना. फाटल्या सप्तकांत बंगळुरू एफसी आड ताका हार घेवची पडिल्ली.अंदूंच्या हंगामांत एफसी गोवाचो खेळ दुसरे खेपे बाबत जाल्लो. दुसरे गजाल म्हणल्यार एफसी गोवाचे चडशे खेळगडे जखमी आसात.
फाटल्या हंगामा परस अंदूंच्या हंगामाक आश्वासक सुरवात केल्या. सात मॅची उपरांत आमी बरे स्थितींत आसात. पूण, गुणतकट्यंतली वयली सुवात कायम राखपाक जाय जाल्यार आमकां खेळांत सुदारणां करप गरजेची आसा. बंगळुरू आड आमी हारलो तरी निकाल वायट ना अशें एफसी गोवाचे मुख्य प्रशिक्षक कार्लोस पेनान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
