मुंबय, सनरायझर्स पयल्या जैताच्या सोदांत

भांगरभूंय | प्रतिनिधी

इंडीयन प्रिमीयर लिगेंत (आयपीएल) आयज मुंबय इंडियन्स आनी सनरायझर्स हैदराबाद ह्या पंगडां मदीं मॅच जातली. दोनूय पंगडांक सुरवातीचे मॅचींत हार घेवची पडल्या. ताका लागून दोगांयचो जैताचें खातें उगडपाचो यत्न आसतलो.

पांच खेपेचो वस्ताद मुंबय इंडियन्सान सदचे भशेन हारीन सुरवात केल्या. गुजरात टायटन्सा आडचे मॅचींत जैताचे स्थितींत आसून लेगीत अखेरच्या खिणाक हार घेवची पडली. ते मॅचींत जसप्रीत बुमरान उत्कृश्ट बॉलींग केल्ली. डेवाल्ड ब्रेव्हिसान जबरदस्त बॅटींग केल्ली आनी रोहीत शर्माचें उपेगी योगदान मुंबय इंडियन्सा खातीर सकारात्मक गजाली आशिल्ल्यो. मुंबय इंडियन्साक एका वेळार 36 बॉलांनी 48 धांवड्यांची गरज आशिल्ली आनी ताच्या हातांत 7 विकेटी बाकी आशिल्ल्यो. तरी आसतना ताका मोख मेळोवपाक जमली ना. हो पंगड वेवस्थापना खातीर हुस्क्याचो विशय आसा.

पयले खेपे मुंबय इंडियन्साचें फुडारपण करपी हार्दीक पांड्या बॅटिंगेक सातवे सुवातेर आयलो. पूण, ताची ही रणनिती येसस्वी थारूंक ना. पंगड वेवस्थापनाक हाचेर परतून विचार करचो पडटलो. फाटल्या हंगामांत गुजरात टायटन्सांत आसतना ताणें वयले सुवातेर बॅटींग केल्ली आनी ताणें आपलो प्रभाव लेगीत सोडिल्लो.

ओपनर इशान किशानान फकत चार बॉलांक तोंड दिल्लें. आयचे मॅचींत ताच्या कडल्यान पंगडाक बऱ्या प्रदर्शनाची आस्त आसतली. संवसारीक टी-20 सर्तीक मतींत दवरून ताका विकेटी फाटल्यान आनी विकेटी मुखार बरें प्रदर्शन करून राष्ट्रीय पंगडांतलो आपलो दावो घटमूक करचो पडटलो. तशेंच मुंबय इंडियन्साक स्पिनर शम्स मुलानी आनी पियुष चावला हांच्या कडल्यान बऱ्या प्रदर्शनाची आस्त आसतली.

दुसरे वटेन सनरायझर्स हैदराबादाक कोलकाता नायट रायडर्सा आडचे मॅचींत निसट्टी हार घेवची पडिल्ली. हॅन्रीक क्लासेनान जबरदस्त बॅटींग करून आपल्या पंगडाक जैताच्या हुमऱ्यार पावयिल्लो. पूण, ताका दुसरे वटेच्यान म्हणपा सारकें योगदान मेळूंक ना.

अभिषेक शर्मा आनी मयंग अगरवाल हे जोडयेन सनरायझर्स हैदराबादाक बरी सुरवात करून दिल्ली. पूण, तांकां आपल्या प्रदर्शनांत सातत्य हाडचें पडटलें. बॉलिंगेंत भुवनेश्वर कुमारान बरी बॉलींग घाल्ली. पूण, उपरांत आंद्रे रसेलान ताची बॉलींग फोडून काडिल्ली. भुवनेश्वर कुमार आयचे मॅचींत उत्कृश्ट प्रदर्शन करपाक सज्ज आसतलो.