भांगरभूंय | प्रतिनिधी
इंडीयन प्रिमीयर लिगेची (आयपीएल) 25वी मॅच येजमान मुंबय इंडियन्स आनी रॉयल चॅलेंजर्स बंगळुरू ह्या पंगडां मदीं हांगाच्या वानखेडे स्टेडियमाचेर जातली.
दोनूय पंगडां मदीं अजून मेरेन 32 मॅची जाल्यात. तातूंतल्यो 18 मॅची मुंबय पंगडान जिखल्यात, जाल्यार 13 मॅचींनी बंगळुरून जैत जोडलां. पूण, मुंबय आड फाटल्या चारांतल्यो चारूय मॅची बंगळुरून जिखल्या. ताका लागून ताच्या जैताक ब्रेक लावपाचो मुंबयचो यत्न आसतलो.
पंजाबा आडची मॅच सोडली जाल्यार फास्ट बॉलर मोहम्मद सिराजान चड धांवड्यो दिल्यात. तशेंच ताका एक लेगीत विकेट मेळूंक ना. आयचे मॅची वरवीं ताचो फॉर्मांत येवपाक शकता. सिराजाच्या नव्या बॉला मुखार इशान किशन आसतलो. सिराजा आड खेळटना किशन गडबडटा. स डावांनी दोन खेपे ताका बाद केला. जाल्यार किशनान फकत 125चे स्ट्रायक रेटीन धांवड्यो केल्यात.
बंगळुरूचो मुखेली फाफ ड्युप्लेसीक अंदूं आपल्या फॉर्मांत सातत्य दवरपाक जमूंक ना. ताणें 35 आनी 44 धांवड्यांची खेळी केल्या आसली तरी पंगडाक जिखून दिवपी खेळी ताका अजून करपाक जमूंक ना. आयचे मॅची वरवीं व्हड खेळी करपाचो ताचो यत्न आसतलो. मुंबयचो येसस्वी फास्ट बॉलर जसप्रीत बुमरा आड तो जलद रितीन 160चे स्ट्रायक रेटीन धांवड्यो करता. सात डावांनी ड्युप्लेसीक एकदाय लेगीत बाद करपाक बुमराक जमूंक ना. पूण, ग्लॅन मॅक्सवॅला आड बुमराचो रॅकॉर्ड बरो आसा. बुमरा आड मॅक्सवॅलान फकत 11 चे सरासरीन आनी 115चे स्ट्रायक रेटीन धांवड्यो केल्यात. मॅक्सवॅलाक अंदूंच्या हंगामांत अजून मेरेन धांवड्यो करपाक जमूंक ना. मॅक्सवॅल पियुष चावला, हार्दीक पांड्या आनी रोमारियो शेफर्ड हांच्या आड 150चे स्ट्रायक रेटीन धांवड्यो केल्यात. ही बंगळुरू खातीर समाधान दिवपी गजाल आसा.
प्रेक्षकांची नदर विराट कोहली आनी जसप्रीत बुमरा हांचे मदले जुगलबंदीचेर आसतली. बुमरा आड कोहलीन 152.17चे स्ट्रायक रेटीन धांवड्यो केल्यात, जाल्यार बुमरान ताका चार खेपे बाद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
