भांगरभूंय | प्रतिनिधी
मुंबय, खबरां संस्था : गोंयांत तशेंच कोंकणांत चवथ व्हडा उमेदीन मनयतात. दर वर्सा मुंबयच्यान लाखांनी गणेशभक्त गोंयांत तशेंच कोकणांत दाखल जातात. फाल्यां सावन सुरू जावपी चवथ मनोवपा खातीर गणेश भक्त व्हडा संख्येन मुंबयच्यान आपापल्या गांवांत येवपा खातीर भायर सरल्यात. मात काल सावन मुंबय- गोंय ह्या म्हामार्गाचेर येरादारीची कोयंडी जाल्या.
मुंबय वा हेर सुवातांचेर काम करपी गणेभक्त चवथ मनोवपाक गोंयांत तशेंच कोकणांत आपल्या गांवांनी येतात. ताका लागून मुंबय- गोंय म्हामार्गाचेर एसटी बसी सोडल्यात. तशेंच खाजगीय वाहनां वाडिल्ल्यान ह्या म्हामार्गाचेर बरीच व्हड येरादारी कोंयडी जाल्ल्याचें पळोवपाक मेळटा.
मुंबय- गोंय राष्ट्रीय म्हामार्गाचेर काल जाल्ली ही येरादारी कोयंडी आयज आनीक वाडल्या. हलनागोठणे, सुकेळी खिंड, लोणेरे वाठारांत ट्रॅफीक जाम जाल्या. आयज सकाळ सावनूच ह्या वाठारांनी वाहनांच्यो लांबचे लांब रांको आसात. मुंबय- गोंय म्हामार्गाचेर बारीक पावस झडिल्ल्यान हांगा सगळ्याक चिखल जाला. ताका लागून वाहनां सवकास चलोवपाची शिटकावणी पुलिसांनी दिल्या.
मुंबयच्यान गोंय, कोंकणांत वचपी पर्यायी मार्ग
मुंबय- गोंय म्हामार्ग (मुंबय- नवी मुंबय- पनवेल- महाड)
मुंबय- वाशी- पाम बीच- उरण फाटा- खारपाडा- वडखळ-महाड
मुंबय, पुणे दृतगती मार्ग (मुंबय- खालापुर- पेण- महाड)
मुंबय, पुणे दृतगती मार्ग (मुंबय-खालापुर- पाली- वाकण- माणगाव- महाड)
मुंबय पुणे दृतगती मार्ग (सातारा- उंब्रज- पाटण- चिपळुण)
मुंबय पुणे दृतगती मार्ग (सातारा- कराड- कोल्हापुर- राधानगरी मार्गान कणकवली)
मुंबय पुणे दृतगती मार्ग (सातारा- कराड- कोल्हापूर- आंबोली मार्गान सावंतवाडी)
मुबयच्यान अटल सेतू मार्गा वेल्यान पळस्पेच्यान मुंबय- गोंय म्हामार्ग
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
