भांगरभूंय | प्रतिनिधी
म्हामार्ग येतलो दर्यादेगां कुशीकच्यान: कोंकणांतल्या ९३ पर्यटन थळांचो घेवपाक मेळटलो आस्वाद
रेवस- रेड्डी, खबरां संस्था : मुंबय- गोंय म्हामार्गाचें काम फाटल्या कांय वर्सां सावन चालू आसा. ह्या हायवे वांगडाच आतां महाराष्ट्राक कोंकणाक वचपाक दोन हायवे मेळटले. कोंकणांतले पर्यटन चालीक लावप हो ह्या म्हामार्गाचो हेत. महाराष्ट्रांत सोबीत अश्यो दर्यादेगो आसात. कोंकणांतल्या दर्या देगां वयल्यान प्रवास करपाची जायत्या जाणांक इत्साय आसता. आतां ही इत्सा प्रत्यक्षांत पुराय जावपाची आसा. कोंकणांतल्या ९३ पर्यटन थळांक जोडपी दर्यादेगावेल्या रस्त्याचें काम बेगीन सुरू जातलें. हे संबंदी महाराष्ट्र राज्य रस्तो विकास म्हामंडळान (एमएसआरडीसी) पावलां उबारल्यांत.
महाराष्ट्राक ७२० किमी.ची दर्यादेग लाभल्या. मुंबय ते सिंधुदुर्ग मेरेन दर्यादेगेवेल्यान दर्यादेगेवेलो म्हामार्ग तयार करपाची येवजण आंखल्या. हो म्हामार्ग विकसीत केल्यार कोंकणाच्या दर्यादेगेवेल्या पर्यटनाक चालना मेळटली. तशेंच प्रवासाची गतीय वाडटली. सैमीक सुंदरकायेन नटिल्ल्या वाठारांतल्यान हो मार्ग वतलो. ताका लागून पर्यटकांक कोंकणाची सोबितकाय अणभवपाक मेळटली. रेवास ते रेड्डी मेरेनच्या दर्या म्हामार्गा खातीर सरकारान निविदा मागयल्या. बांदकाम निविदा फायनल करपाची प्रक्रिया सरकारान वेगान चालू केल्या. फुडल्या कांय म्हयन्यांनी ह्या प्रकल्पाचें काम सुरू जावपाची शक्यताय आसा.
महाराष्ट्र राज्य रस्तो उदरगत म्हामंडळाच्या रेवस ते रेड्डी दर्यादेगेवेल्या प्रकल्पा खाला एमएसआरडीसीन रेवस ते कारंजा आनी आगरदांडा अशा दोन आखात पुलां खातीर तंत्रीक निविदा मागयल्ली. हे निविदेक बरो प्रतिसाद मेळ्ळा आनी ह्या दोनूय पुलां खातीर वट्ट पांच निविदा सादर केल्यात. रेवस ते कांरजा खातीर दोन जाल्यार आगरदांडा ते दीघी खातीर तीन निविदा सादर केल्यात. आतां अर्थीक निविदा बेगीन सुरू जातली. रेवस ते रेड्डी सी हायवे रायगड, रत्नागिरी, सिंधुदुर्ग जिल्ह्यांतल्यान वयतलो.
दर्या देगां वयल्यान वचपी मार्ग कसो आसा?
रेवस- रेड्डी दर्यादेग रस्तो सुमार ४४७ किमी लांबायेचो आसा. मूळ रेवस- रेड्डी असो दर्यादेगे वयलो रस्तो सेगीत आसचो ना. आठ खाडीपूल बांदून दर्यादेगे वयलो मार्ग बांदतले. ते प्रमाण, रेवस, दिघी, बाणकोट, केळशी, दाभोळ, भाट्ये, वाडातिवरे ह्या सुवातांचेर पूल बांदतले. ह्या प्रकल्पा खातीर १० हजार कोटी रुपयांचो खर्च अपेक्षीत आसा. ह्या दर्यादेग वाठारांतल्यान वचपी मार्गाक लागून कोंकणांतली सैमीक सोबितकाय आनी दर्यादेगांचो अणभव घेवपाक मेळटलो. विशेश म्हळ्यार कोंकणांतल्या ९३ पर्यटन थळांक हो मार्ग जोडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
