भांगरभूंय | प्रतिनिधी
बायलांचे प्रिमियर लिगेंत (डब्ल्यूपीएल) काल जाल्ले मॅचींत सध्याचो वस्ताद मुंबय इंडियन्सान 7 विकेटींनी हारयलो.
हांगाच्या एम चिन्नास्वामी स्टेडियमाचेर जाल्ले मॅचींत येजमान रॉयल चॅलेंजर्स बंगळुरून टॉस हारल्या उपरांत पयलीं बॅटींग करपाचो निर्णय घेतलो. पूण, ताचो हो निर्णय चुकीचो थारलो. ताका निर्धारीत 20 ओव्हरींनी 6 विकेटी वगडावन 131 धांवड्यो करप शक्य जाल्यो.
एलिस पेरीन सगल्यांत चड नाबाद 44 धांवड्यो केल्यो. तिचे खेरीत एकाय बॅटराक व्हड खेळी करपाक जमली ना. सकयले सुवातेर बॅटींग करपी वरेहमान 27 धांवड्यांचें योगदान दिलें. मुंबय इंडियन्सा वतीन नेट शिवर ब्रण्ट, पुजा वस्त्रकर हांणी दरेकी दोन विकेटी घेतल्यो. वॉंग आनी साईका इसाक हिका एकेक विकेट फावो जाली.
मोखीचो फाटलाव करपी मुंबय इंडियन्सान आक्रमक सुरवात केली. डावाची सुरवात करपाक आयिल्ले यास्तिका भाटिया आनी हेली मॅथ्यूज हांणी पयले विकेटी खातीर 45 धांवड्यांची भागिदारी केली. अखेरेक श्रेयांकान भाटियाक बाद करून ही जोडी फोडली. यास्तिकान 15 बॉलांनी 31 धांवड्यो केल्यो. ते उपरांत मॅथ्यूज लेगीत रोखडीच बाद जाली. तिणें 26 धांवड्यांचें योगदान दिलें. तिसरे सुवातेर बॅटींग आयिल्ले नेट सिव्हर ब्रंट आनी अमेलिया कर हांणी डाव मुखार व्हरतना पंगडाचो स्कोर 100च्या वयर पावयलो. ही जोडी मुंबय इंडियन्साक जैत मेळोवन दितलें अशें दिसता आसतना ब्रंट 27 धांवड्यो करून बाद जाली.
उरिल्ली औपचारिकताय अमेलिया आनी पुजा हांणी पुर्ण केली. अमेलिया 24 बॉलांनी नाबाद 40 धांवड्यो केल्यो. हातूंत सात चवक्यांचो आस्पाव आशिल्लो. पुजान नाबाद 8 धांवड्यो केल्यो.
ह्या जैतान मुंबय इंडियन्स गुणतकट्यांत पयले सुवातेर परतून पावलो. दिल्ली कॅपिटल्स दुसरे सुवातेर घसरलो. दुसरे वटेन मॅच हारल्या उपरांत रॉयल चॅलेंजर्स बंगळुरूची स्थिती इबाडली. तो चवथे सुवातेर घसरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
