भांगरभूंय | प्रतिनिधी
इंडीयन प्रिमीयर लिगेंत (आयपीएल) काल येजमान मुंबय इंडियन्सान रॉयल चॅलेंजर्स बंगळुरूक 7 विकेटींनी हारयलो. रॉयल चॅलेंजर्स बंगळुरून दिल्ली 197 धांवड्यांची मोख मुंबय इंडियन्सान 15.3 ओव्हरींनी सहज मेळयली.
ईशान किशन आनी रोहीत शर्मा हांणी आक्रमक सुरवात करून दिल्या उपरांत सुर्यकुमार यादवान 17 बॉलांनी अर्द शेंकडो मारून बंगळुरूची जैताची आस्त सोंपयली. दरेक बॉल शिमे भायर धांवडावपाचो होच निर्धार करून मुंबय इंडियन्साचे बॅट्समन मैदानांत देंविल्ले अशेंच दिसलें.
सुर्यान 360 डिग्री शॉर्ट मारून प्रेक्षकांचीं मनां जिखलीं. बॅटींग करपाक उत्कृश्ट आशिल्ले खेळपट्टीचेर फास्ट बॉलर जसप्रीत बुमरान 5 विकेटी घेवन हिरो थारलो.
ते आदीं मुखेली फाफ ड्युप्लेसीसाच्या 61, रजत पाटीदाराच्या 50 आनी निमाण्या ओव्हरींनी दिनेश कार्तिकान काडिल्ल्या नाबाद 53 धांवड्यांचे आक्रमक बॅटिंगे नेटार रॉयल चॅलेंजर्स बंगळुरून निर्धारीत 20 ओव्हरींनी 8 विकेटी व्हगडावन 196 धांवड्यो केल्यो.
मुंबय इंडियन्साचो मुखेली हार्दीक पांड्यान टॉस जिखून बंगळुरूक पयलीं बॅटींग करपाचें आमंत्रण दिलें. ताचो हो निर्णय ताच्या बॉलरांनी योग्य थारायलो. जबरदस्त फॉर्मांत आशिल्ल्या विराट कोहलीक काल व्हड खेळी करपाक जमली ना. तिसरे ओव्हरींत बंगळुरूक पयलो धपको बसलो. कोहली फकत 3 धांवड्यो करून बाद जालो. चवथे ओव्हरींत विल जॅक्स (8) लेगीत सवाय भितर तंबूंत परतलो. मुंबय मॅचीचेर पकड मेळयली अशें दिसता आसतना रजत पाटीदार आनी मुखेली फाफ ड्युप्लेसीस हांणी खेळपट्टीचेर तग धरलो. दोगांयनी वैयक्तीक अर्द शेंकडे नोंदयले. तरी लेगीत मुंबयच्या बॉलरांनी अदीं मदीं धक्के दिवपाचें सत्र चालूच दवरिल्लें.
ड्युप्लेसीस आनी पाटीदार हांणी तिसरे विकेटी खातीर 82 धांवड्यांची भागिदारी केली. पाटीदारान 26 बॉलांनी तीन चवके आनी चार सक्यांचे मजतीन 50 धांवड्यो केल्यो. तो बाद जाल्या उपरांत बंगळुरूचो डाव परतून गडगडलो. ग्लॅन मॅक्सवॅल, महिपाल लोमरोर आनी विजयकुमार वैशाख हांकां खातें लेगीत उगडपाक जमलें ना. ड्युप्लेसीसान 40 बॉलांनी चार चवके आनी तीन सक्यांचे मजतीन 61 धांवड्यांची खेळी केली. सौरव चौहान 9 धांवड्यो करून बाद जालो.
दिनेश कार्तिकान 23 बॉलांनी पांच चवके आनी चार सक्यांचे मजतीन नाबाद 53 धांवड्यांची आक्रमक खेळी केली. आकाश दीप दोन धांवड्यो करून नाबाद रावलो.
मुंबय इंडियन्सा वतीन फास्ट बॉलर जसप्रीत बुमरान 21 धांवड्यो दिवन 5 विकेटी घेतल्यो. गेराल्ड कोएत्झी, आकाश मधवाल आनी श्रेयस गोपाळ हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
