मुंबय इंडियन्साचें आनीक एक जैत

भांगरभूंय | प्रतिनिधी

मुंबय इंडियन्सान बायलांचे प्रिमियर लिगेंत (डब्ल्यूपीएल) सेगीत पांचव्या जैताची नोंद केली. ब्रेबोर्न स्टेडियमाचेर जाल्ले मॅचींत ताणें गुजरात जायण्ट्साक 55 धांवड्यांनी हारयलो. ह्या जैता सयत मुंबय इंडियन्सान प्ले ऑफांतलो आपलो दावो आनीक घटमूट केलो. गुणतकट्यांत 10 गुणां सयत तो पयले सुवातेर आसा.

मुंबय इंडियन्सा दिल्ले 163 धांवड्यांचे मोखीचो फाटलाव करपी गुजरात जायण्ट्साक 20 ओव्हरींनी 9 विकेटी वगडावन फकत 107 धांवड्यो करप शक्य जाल्यो.

ताच्या एकाय बॅटराक व्हड खेळी करपाक जमली ना. हरलीन देओलान सगल्यांत चड 22 धांवड्यो केल्यो. ताच्या सात बॅटरांक दोट्टी आंकडो लेगीत हुपपाक जमलो ना.

मुंबय इंडियन्सा वतीन नॅट सिव्हर ब्रंट आनी हेली मॅथ्यूज हांणी दरेकी तीन विकेटी घेतल्यो. ह्या दोगां खेरीत एमेली केरान दोन आनी ईश वॉंग हिणें एक विकेट घेतली.

ते आदीं टॉस हारल्या उपरांत पयलीं बॅटींग करतना मुंबय इंडियन्सान 20 ओव्हरींनी 8 विकेटी वगडावन 162 धांवड्यो केल्यो. मुखेली हरमनप्रीत कौरान 30 बॉलांनी 51 धांवड्यांची आक्रमक बॅटींग केली. जाल्यार ओपनर यास्तिका भाटियान 44 धांवड्यांचें योगदान दिलें.

तशें पळोवपाक गेल्यार मुंबय इंडियन्साची सुरवात बरी जाली ना. फॉर्मांत आशिल्ली हेली मॅथ्यूजाक डावाचे पयलेच ओव्हरीच्या चवथ्या बॉलाचेर बाद जाली. ताका अॅश्ले गार्डनरान बाद केली. हेलीक खातें लेगीत उगडपाक जमलें ना.

ते उपरांत नॅट सिव्हर ब्रंट आनी यास्तिका भाटिया हांणी दुसरे विकेटी खातीर 74 धांवड्यांची भागिदारी केली. सिव्हरान 31 बॉलांनी पांच चवके आनी एका सक्याचे मजतीन 36 धांवड्यो करून बाद जाली.

यास्तिका भाटियाक स धांवड्यांनी अर्द शेंकडो चुकलो. ती 37 बॉलांनी पांच चवके आनी एका सक्याचे मजतीन 44 धांवड्यो करून धांवबाद जाली. ते उपरांत हरमनप्रीत कौर आना अमेलिया केर हांणी चवथे विकेटी खातीर 51 धांवड्यांची भागिदारी केली. अमेलिया 19 धांवड्यो करून बाद जाली. त्याच वेळार इसी वॉंग हिका खातें लेगीत उगडपाक जमलें ना. ते उपरांत हरमनप्रीत सिंगान सगलीं सुत्रां आपल्या हातांत घेतली. तिणें आक्रमक बॅटींग करपाक सुरवात केली. पूण, अर्द शेंकडो पुर्ण जाल्या उपरांत धांवगती वाडोवपाच्या यत्नांत तिणें आपली विकेट वगडायली. गार्डनराच्या बॉलाचेर हरलीन देओलान तिची कॅच धरली.

हरमनप्रीत बाद जाल्या उपरांत हुमैरा काझी (2) आनी अमनजोत कौर (0) हांकां व्हड खेळी करपाक जमली ना. धारा गुज्जर एक धांवडी करून आनी जिंतीमणी कलिता ही दोन धांवड्यो करून नाबाद उरली.

गुजरात जायण्ट्सा वतीन अॅश्ले गार्डनरान तीन विकेटी घेतल्यो. किम गर्थ, स्नेह राणा आनी तनुजा हांकां दरेकी एक विकेट फावो जाली.

गुजरातान हे मॅची खातीर आपल्या पंगडांत दोन बदल केले. लौरा वॉल्वार्टाचे सुवातेर सोफिया डंकली आनी जॉर्जिया वॅयरहमाचे सुवातेर एनाबेल सदरलॅण्डाचो आस्पाव केलो. मुंबय इंडियन्सान मात आपल्या पंगडांत कसलोच बदल केलो ना. फाटले मॅचींत खेळयिल्लोच पंगड ताणें हे मॅचींत खेळयलो.