भांगरभूंय | प्रतिनिधी
बायलांचे प्रिमियर लिगेचे (डब्ल्यूपीएल) 15वे मॅचींत मुंबय इंडियन्साक पयली हार घेवची पडली. अखेरचे ओव्हरी मेरेन रंगिल्ले मॅचींत युपी वॉरियर्सान मुंबय इंडियन्साक पांच विकेटींनी हारयलो.
टॉस हारल्या उपरांत पयलीं बॅटींग करतना मुंबय इंडियन्सान 20 ओव्हरींनी 127 धांवड्यो केल्यो. प्रत्त्युत्तर दितना युपी वॉरियर्सान 19.3 ओव्हरींनी पांच विकेटी वगडावन मोख मेळयली. मुंबय इंडियन्सान हे लिगेंत आतां मेरेन स मॅची खेळ्ळ्यात आनी तातूंतल्यो पांच जिखल्यात. ताणे प्ले ऑफांतली आपली सुवात पयलींच निश्चीत केल्ल्यान कालचे हारीचो ताचेर कांयच फरक पडपाक ना.
युपी वॉरियर्साक निमाण्या 12 बॉलांनी 13 धांवड्यांची गरज आशिल्ली. सोफी एक्लेस्टोन आनी दिप्ती शर्मा ह्यो बॅटर खेळपट्टीचेर आशिल्ल्यो. हेली मॅथ्यूजान 19वे ओव्हरींत बॉलींग करतना आठ धांवड्यो दिल्यो. ते उपरांत युपी वॉरियर्साक अखेरचे ओव्हरींत पांच धांवड्यांची गरज आशिल्ली. इस्सी वॉंगान पयल्या दोन बॉलांचेर एकूय धांवडी दिवंक ना. सोफी एक्लेस्टोनान तिसऱ्या बॉलाचेर सको मारून युपी वॉरियर्साक जैत मेळोवन दिलें.
युपी वॉरियर्सान अशे तरेन तिसरें जैत जोडलें. ह्या जैतान स गुणां सयत तिसरे सुवातेर उडी घेतली. युपी वॉरियर्स प्ले ऑफांतले सर्तींत अजून आसा. मुंबय इंडियन्स 10 गुणां सयत पयले आनी दिल्ली कॅपिटल्स 8 गुणां सयत दुसरे सुवातेर पावलो. युपी वॉरियर्स आनी मुंबय इंडियन्स हांच्यो अजून दोन मॅची बाकी आसात.
पयलीं बॅटींग करतना मुंबय इंडियन्सान बरी सुरवात केली. हेली मॅथ्यूज आनी यास्तिका भाटिया हांणी पयले विकेटी खातीर 30 धांवड्यांची भागिदारी केली. यास्तिकाक फकत सात धांवड्यो करप शक्य जाल्यो. ते उपरांत फॉर्मांत आशिल्ल्या नॅट सिव्हर ब्रंटाक कांय खाशेलें प्रदर्शन करपाक जमूंक ना. हेली मॅथ्यूज धांवगती वाडोवपाच्या यत्नांत बाद जाली. तिणें 30 बॉलांनी एक चवको आनी तीन सक्यांचे मजतीन 35 धांवड्यो करप शक्य जाल्यो.
मुखेली हरमनप्रीत कौरान 22 बॉलांनी 25 धांवड्यो केल्यो. अमेलिया कॅर सवाय भितर बाद जाली. मुंबयच्या आठ बॅटरांक दोट्टी आंकडो लेगीत हुपपाक जमलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
