भांगरभूंय | प्रतिनिधी
इंडीयन प्रिमीयर लिगेचे (आयपीएल) 33वे मॅचींत आदलो वस्ताद मुंबय इंडियन्सान येजमान पंगाब किंग्साक 9 धांवड्यांनी हारयलो. मुंबय इंडियन्सान पयलीं बॅटींग करून निर्धारीत 20 ओव्हरींनी 9 विकेटी व्हगडावन 192 धांवड्यो केल्यो, जाल्यार मोखीचो फाटलाव करपी पंजाब किंग्सान 19.1 ओव्हरींनी सगल्यो विकेटी व्हगडावन 183 धांवड्यां मेरेन मजल मारली.
ह्या जैतान मुंबय इंडियन्सान प्ले ऑफांत सुवात मेळोवपाची आपली आस्त कायम राखली.
एका वेळार मुंबय इंडियन्स ही मॅच सहज जिखतलो अशें दिशिल्लें. ताच्या जसप्रीत बुमरा आनी गेराल्ड कोएत्झी हाणें पंजाबाचे सुरवातीचे चार बॅट्समनांक फकत 14 धांवड्यांचेर तंबूंत धाडिल्ले. ह्या धपक्यातल्यान पंजाब किंग्साक शशांक सिंग आनी आशुतोष शर्मा हे जोडयेन पुनरागमन करून दिलें. आशुतोषान मुंबय इंडियन्साची बॉलींग फोडून काडली. पूण, ताचो संघर्श अपेशी थारलो आनी मुंबय इंडियन्साक जैत फावो जालें.
शिखर धवनाचे गैरहाजेरेंत पंजाब किंग्साची सुरवात परतून निर्शेणी हाडपी थारली. मुखेली सॅम करन (6) डावाची सुरवात करपाक आयलो. पूण, जसप्रीत बुमरान ताका दुसरेच ओव्हरींत बाद केलो. दुसरे वटेच्यान गेराल्डान पंजाबाच्या प्रभसिमरन सिंग (0) आनी लिएम लिव्हिंगस्टन (1) हाका बाद केलो. जॉनी बॅयरस्टोचे सुवातेर संद मेळिल्ल्या रिली रोसूव (0) हाका बुमरान उत्कृश्ट यॉर्कराचेर बोल्ड केलो. हरप्रीत भाटिया इम्पॅक्ट प्लेयर म्हणून आयलो आनी शशांक सिंगा वांगडा मेळून डाव सांबाळपाचो यत्न केलो. पंजाबान पावर प्लेंत 4 बाद 40 धांवड्यो केल्ल्यो. पूण, श्रेयस गोपाळान स्वताचे बॉलिंगेचेर कॅच धरून हरप्रीताक (13) तंबूंत धाडलो.
5 बाद 49 वयल्यान पंजाबाचें पुनरागमन अशक्य दिसतालें. पूण, शशांक आनी आशुतोष हे जोडयेन 17 बॉलांनी 34 धांवड्यांची भागिदारी करून मुंबयक घाम काडलो. त्या वेळार बुमरान स्लोव्हर बॉलाचेर शशांकाक (41) बाद केलो. दुसरे वटेच्यान आशुतोषान आक्रमक खेळी चालूच दवरिल्ली. पूण, अखेरेक तो बाद जालो आनी पंजाबाची आस्त सोंपली. ते उपरांत उरिल्ल्यो विकेटी रोखड्यो पडल्यो आनी मुंबयक 9 धांवड्यांनी जैत फावो जालें.
रोहीत शर्मा आनी सुर्यकुमार यादव हांचे आक्रमक बॅटिंगे उपरांत लेगीत पंजाब किंग्सान मॅचींत बरे तरेन पुनरागमन केल्लें. बॉलिंगेंत योग्य बदल आनी अचूक मारो करून पंजाब किंग्सान मुंबय इंडियन्साचे धांव गतीचेर अंकूश दवरिल्लो. सुर्याचो अर्द शेंकडो नोंदयलो. पूण, ताची स्ट्रायक रेट म्हणपा सारकी नाशिल्ली. तिलक वर्मा आनी टीम डॅव्हिड हाणें अखेरच्या ओव्हरींनी विस्फोटक बॅटींग करून पंगडाक व्हड धांवसंख्या उबारून दिवपाक मजत केली.
तिसरेच ओव्हरींत इशान किशन (8) बाद जाल्या उपरांत सुर्यकुमार यादव आनी रोहीत शर्मा हाणें दुसरे विकेटी खातीर 57 बॉलांनी 81 धांवड्यांची भागिदारी करून मुंबय इंडियन्साचो डाव सांबाळ्ळो. इशान किशनाची विकेट ही कगिसो रबाडाची टी-20तली 250वी विकेट थारली. रोहीतान आयपीएलांत 6500 धांवड्यांचो पांवडो हुपलो आनी असो पराक्रम करपी तो चवथो बॅट्समन थारलो. हर्षल पटेलाच्या स्लोव्हर बॉलाचेर रोहीतान एका हातान सको हुबयलो. पूण, फुडलेच ओव्हरींत सॅम करनाच्या बॉलाचेर व्हड शॉर्ट खेळपाच्या यत्नांत रोहीत कॅच बाद जालो. ताणें 25 बॉलांनी दोन चवके आनी तीन सक्यां सयत 36 धांवड्यो केल्यो.
रोहीत बाद जाल्या उपरांत मुंबयच्या धांवांची गती कांय प्रमाणांत स्लो करपाक पंजाबाच्या बॉलरांक येस आयलें. हे खेळपट्टीचेर अचूक मारो केल्यार बॅट्समनांचेर चेपण दवरप शक्य आसा हें पंजाबाक कळ्ळें, दुसरे वटेन मुंबय पंगड वेवस्थापनान स्फोटक रितीन बॅटींग करपी बॅट्समन आसतना तिलक वर्माक वयले सुवातेर बॅटिंगेक धाडलो. अखेरच्या पांच ओव्हरींनी सुर्यान हात मेकळे करतना रबाडाची बॉलींग फोडून काडली. तिलकान लेगीत सको मारून 16वे ओव्हरींत 18 धांवड्यो पुर्ण केल्यो. सॅमान 17वे ओव्हरींत सुर्याची आक्रमक खेळी थांबयली. प्रभसिमरन सिंगान उत्कृश्ट कॅच धरली. सुर्यान 53 बॉलांनी सात चवके आनी तीन सक्यांचे मजतीन 78 धांवड्यो केल्यो.
हर्षल पटेलान स्लो बॉलाचेर मुखेली हार्दीक पांड्याक (10) बाद केलो. तिलक वर्मा आनी टिम डॅव्हिडान (14) जबरदस्त बॅटींग करून मुंबय इंडियन्साक 7 बाद 192 धांवड्यां मेरेन मजल मारून दिली. हर्षल पटेलान 20वे ओव्हरींत दोन विकेटी घेतल्यो. तिलकान 18 बॉलांनी दोन चवके आनी दोन सक्यांचे मजतीन नाबाद 34 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
