भांगरभूंय | प्रतिनिधी
इंडीयन प्रिमीयर लिगेचो (आयपीएल) पांच खेपेचो वस्ताद मुंबय इंडियन्साक अंदूंच्या हंगामांत सेगीत तिसरे हारीक तोंड दिवचें पडलें. 17व्या हंगामांतले 14वे मॅचींत घरच्या मैदानाचेर खेळपी मुंबय इंडियन्साक राजस्थान रॉयल्सान 6 विकेटींनी हारयलो. राजस्थान रॉयल्साचें सेगीत हें तिसरें जैत थारलें.
मुंबय इंडियन्सान दिल्ली 126 धांवड्यांची मोख राजस्थान रॉयल्सान 15.3 ओव्हरींनी 4 विकेटी वगडावन 127 धांवड्यो करून मेळयली.
मदले फळयेंतलो बॅट्समन रियान परागान नाबाद 54 धांवड्यांची खेळी केली. मुंबय इंडियन्सा वतीन आकाश मढवळान 20 धांवड्यो दिवन 3 विकेटी घेतल्यो.
ते आदीं लेग स्पिनर युजवेंद्र चहल आनी फास्ट बॉलर ट्रॅण्ट बोल्ट हांचे उत्कृश्ट बॉलिंगे नेटार राजस्थान रॉयल्सान मुंबय इंडियन्साचो डाव निर्धारीत 20 ओव्हरींनी 9 विकेटी घेवन 125 धांवड्यांचेर आडायलो.
चहलान 11 आनी बोल्टान 22 धांवड्यो दिवन दरेकी 3 विकेटी घेतल्यो. फास्ट बॉलर नांद्रे बर्गरान 32 धांवड्यो दिवन 2 विकेटी मेळयल्यो. मुखेली हार्दीक पांड्या (34) आनी तिलक वर्मा (32) हांकां सोडून मुंबय इंडियन्साचो एकूय बॅट्समन खेळपट्टीचेर तग धरपाक शकलो ना. ह्या दोगां खेरीत टिम डॅव्हिड (17) आनी ओपनर इशान किशन (16) हेच दोट्टी आंकड्यां मेरेन पावपाक शकले.
रॉयल चॅलेंजर्साच्या बॉलरांनी पुर्ण मॅचीचेर आपलो शेक दवरलो. मुंबयचे तीन बॅट्समन पयल्याच बॉलाचेर बाद जाले. जाल्यार निमाण्या चार ओव्हरींनी पंगडाक फकत 14 धांवड्यो करप शक्य जाल्यो.
राजस्थान रॉयल्साचो मुखेली संजू सॅमसनान टॉस जिखून मुंबय इंडियन्साक पयलीं बॅटींग करपाचें आमंत्रण दिलें आनी ताच्या बॉलरांनी खास करून फास्ट बॉलर ट्रॅण्ट बोल्टान सॅमसनाचो निर्णय योग्य थारायलो.
बोल्टान पयले ओव्हरीच्या निमाण्या दोन बॉलांचेर रोहीत शर्मा (0) आनी नमन धीर (0) हांकां तंबूंत धाडले. विकेटकीपर सॅमसमान रोहीताची कॅच धरली, जाल्यार नमन एलबीडब्ल्यू बाद जालो.
दुसरो ओपनर इशान किशनान (16) नांद्रे बर्गराक सको आनी चवक्यान येवकार दिलो. मुंबयक पयलेच ओव्हरी उपरांत डेवाल्ड ब्रेविसाक (0) इम्पॅक्ट प्लेयराच्या रुपान मैदानांत देंवचो पडलो. पूण, बोल्टाच्या पयल्या बॉलाचेर बर्गर ताणें कॅच दिवन बाद जालो. इशानान बर्गराक चवको मारलो. पूण, फुडल्या बॉलाचेर इशानान बाद केलो. विकेटकीपर सॅमसनान ताची कॅच धरली. ताका लागून स्कोर 4 बाद 20 असो जालो.
तिलक वर्मान येना फुडें बोल्टाक सको मारलो. पूण, प्रेक्षकांच्या हुटिंगाक तोंड दिवपी हार्दिक पांड्यान बर्गराक तीन चवके मारले. पांड्याक सरावांत आनी टॉस करपाच्या वेळार लेगीत हुटिंगाक तोंड दिवचें पडिल्लें.
वर्मान आवेश खानाचे बॉलिंचेर आपलो दुसरो सको मारलो. जाल्यार पांड्यान ऑफ स्पिनर आर आश्विना आड चवको मारलो. ते उपरांत चहला आड व्हड शॉर्ट मारपाच्या यत्नांत पांड्या लॉंग ऑनांत कॅच दिली. ताणें 21 बॉलांनी स चवक्यांचे मजतीन 34 धांवड्यो केल्यो.
आवेशान पियुष चावलाक (3) बाद केलो, जाल्यार वर्मा लेगीत चहलाचे बॉलिंगेचेर आश्विनाक कॅच दिली. ताका लागून मुंबयचो स्कोर 7 बाद 95 असो जालो. मुंबयचो शेंकडो 15वे ओव्हरींत पुर्ण जालो. गेराल्ड कोएट्जी (4) लेगीत चहलाच्या बॉलाचेर शिमरोन हेटमायराक कॅच दिवन परतलो. जाल्यार टिम डॅव्हिडाच्या रुपान बर्गराक दुसरी विकेटी फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
