मुंडकार खटले निकालांत काडपा खातीर विशेश मामलेदार नेमचो

भांगरभूंय | प्रतिनिधी

कूळ मुंडकार संघटणेची मागणी

पणजीः ‘रावता ताचें घर आनी कसता ताची जमीन’ ही संकल्पना मुखार दवरून गोंयचे पयले मुख्यमंत्री दयानंद बांदोडकार हांणी मुंडकार कायदो हाडलो. पूण आतांचें सरकार ताची पुरायेन अंमलबजावणी करपाक अपेशी थारलां. देखून मुंडकारांच्यो समस्या बेगीन निकालांत काडपा खातीर विशेश मामलेदार नेमचो अशी मागणी गोंय कूळ मुंडकार संघटणेन केल्या.

संवसारीक कसयकार दिसा निमतान गोंय कूळ मुंडकार संघटणेन पणजे पोरण्या सचिवालया लागसार गोंयचे पयले मुख्यमंत्री सर्गेस्त दयानंद बांदोडकार हांच्या पुतळ्याक अभिवादन करून पत्रकारां कडेन उलयतना आपली मागणी मांडली.

ह्या वेळार उलयतना समितीचे समन्वयक डेनियल डिसोझा हांणी सांगलें, गोंयचे पयले मुख्यमंत्री भाऊसायब बांदोडकार हांणी पयलो विशय घेतलो तो गोंयच्या गांवांगांवांनी शिक्षण पावोपाचो. उपरांत भाटकार मुंडकारांक कशे पिडटात हें तांच्या लक्षांत आयलें. देखून कसता ताची जमीन आनी रावता ताचें घर म्हूण मुंडकार कायदो अस्तित्वांत हाडलो.

दुख्खाची गजाल म्हणल्यार इतलीं वर्सां जावन गेलीं पूण ह्या कायद्याची सरकारान अजून मेरेन दखल घेवंक ना. कुळकार न्यायालयांत झगडत आसात तांकां न्याय मेळना. केन्ना मामलेदार आपल्या कामां खातीर भायर सरिल्लाे आसता वा दुसऱ्या कामांत व्यस्त आशिल्ल्या कारणान फक्त ‘तारीख पे तारीख’ मेळटा. आदवोगादांक पयशे मोडटात, पूण न्याय मेळना. देखून हे विशीं स्वतंत्र मामलेदार वेंचून ह्यो केसी तांचे कडेन दिवच्यो, अशी मागणी डिसोझा हांणी केली.

भाटकारांचे जमनींत बारीक शेतकार कश्ट करून पोट भरताले. हें सगलें पळोवन 1961 वर्सा गोंय स्वतंत्र जाले उपरांत भाऊसायब बांदोडकार हांणी 1973 वर्सा हो कायदो अस्तित्वांत हाडलो. आतां 50 वर्सां मायज जालीं हाची अंमलबजावणी सारकी जावंक ना, अशें संघटणेचे वांगडी दिपेश नायक हांणी सांगलें.

जमनीचें सर्वेक्षण करून तांकां सनदी दिवप हो एक सोंपो कायदो. जे मुंडकार भाटकाराचे सुवातेंत रावतात तांकां 300 चौखण मिटर जमनींत घर बांदपाक मेळना. घर दुरुस्त करपाक, लायटीचें तशेंच उदकाची जोडणी घेवपाक भाटकार तांकां हरकत ना दाखलो दिनात. देखून कितलिंशींच वर्सां जालीं आमी विशेश मामलेदारांची मागणी करतात, अशें दिपेश नायक हांणी सांगलें.

फाटल्या वर्सा उच्च न्यायालयान मुंडकार खटले निकालांत काडपा खातीर विशेश दंडाधिकाऱ्याची नेमणूक करपाचो आदेश काडिल्लो. पूण अजून मेरेन हाचेर कसलीच कार्यवाही महसूल मंत्री बाबूश मोंसेरात हांणी करूंक ना. शेनवार आनी आयतार ह्या दिसा हे खटले निकालांत काडपाचें थारिल्लें, पूण खंयचे कडेन कांयच ना अशें संघटणेचे वांगडी संतोष मांद्रेंकार हांणी सांगलें.

जाल्यार गोंय सरकार कुळांक न्याय दिवपाचे सोडून तांच्यो जमनी पीपीपी तत्वाचेर विकती घेवन दिल्लीकारांक विकतात. दिल्लींत गोंयच्या जमनींचें प्रदर्शन भरता आनी सूट बूट मारून पयशेकार लोक जमनी विकत्यो घेवपा खातीर थंयसर येतात असो आरोप वांगडी संजय बर्डे हांणी केलो.