भांगरभूंय | प्रतिनिधी
एप्रीलाच्या पयल्या 15 दिसांत 19 जाणांक अपघातांत मरण
मडगांव, प्रतिनिधी ः गोंयांत अपघातांची माळ चालूच आसा. तांतूत मरण येवप्यांचो आंकडो बरोच वाडटा. एप्रीलाच्या पयल्या 15 दिसांत 19 जाणांक अपघातांत मरण आयलें. हाची चर्चा चालू आसतनाच आयज मुंगूल माडेल दुचाकीन वीज खांब्याक धपको दिल्ल्यान अपघातांत दोगांक मरण आयलें.
मेळिल्ले म्हायती प्रमाण, मूळ झारखंडांतले पूण कामां निमतान रिवण वाठारांत रावपी जीवन सोरेन (21) आनी दालू कुजल (17) आयतारा रातीं सुमार इकरा वरांचेर दुचाकी वयल्यान मडगांव सावन कोलवा वटेन वताले. कोलवा वटेन वचपी रस्त्यार मुंगूल माडेल वाठारांत पावतकच दुचाकी वयलो ताबो सुटलो आनी दुचाकीन संरक्षण वण्टीक नेटाचो धपको दिलो. उपरांत वीज खांब्यांक धपको दिलो. दुचाकी वेगान आशिल्ल्यान प्रवास करपी जीवन आनी दालू दोगूय गंभीर जखमी जाले. दोगांकय उपचारा खातीर दक्षीण गोंय जिल्हो हॉस्पिटलांत व्हेले. पूण तो मेरेन तांका मरण आयल्लें.
ह्या अपघाताची म्हायती मेळ्ळ्या उपरांत फातोड्ड्यां पुलिसांनी थळार वचून पंचनामो केलो. दोनूय कुडी पोस्टमार्टमा खातीर द. गोंय जिल्हो हॉस्पिटलाच्या शवागारात दवरल्यात. ह्या प्रकरणांत पुलीस निरिक्षक नाथन आल्मेदा हांच्या मार्गदर्शना खाला फुडली चवकशी चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
