मीरान मेळयलो पॅरीस ऑलिम्पिकाचो कोटा

भांगरभूंय | प्रतिनिधी

टोकियो ऑलिम्पिकांत कांश्या पदक जिखपी भारताची वॅटलिफ्टर मीराबाई चानू हिणें आयडब्ल्यूएफ संवसारीक करंड सर्तीचे बायलांचे 49 कील वजन गटांत तिसरी सुवात फावो जाली. अशे तरेन मीराबाईन पॅरीस ऑलिम्पिकाची पात्रताय लेगीत मेळयली. मीराबाई दुखापतीक लागून सर्ती पसून पयस आशिल्ली. अखेर स म्हयन्यांनी तिणें पुनरागमन केलें आनी वट्ट 184 कील वजन उखल्लें. पॅरीस ऑलिम्पिकाची पात्रताय मेळोवपा खातीर ही निमाणी वॅटलिफ्टींग सर्त आशिल्ली.

तिची सर्त पुर्ण जाल्ल्यान, मीराबाईन पॅरीस ऑलिम्पिका खातीर निर्धारीत वेळांत निकशांची पुर्तताय केली. हातूंत दोन सर्ती आनी आनीक तीन पात्रताय फेरयांनी वांटो घेवप सक्तीचें आसा. भारताची 2017 संवसारीक वस्ताद मीराबाई सध्या बायलांच्या 49 कील ऑलिम्पीक पात्रताय क्रमवारींत (ओक्यूआर) चीनाचे जियान हुइहुआच्या उपरात दुसरे सुवातेर आसा.

ओक्यूआर अद्ययावत जाल्या उपरांत पात्र खेळगड्यांची अधिकृत घोशणा संवसारीक सर्त सोंपल्या उपरांत करतले. दरेक वजन गटांत पयले 10 लिफ्टर्स पॅरीस ऑलिम्पिका खातीर पात्र थारतले. मीराबाईन पोरूं सप्टेंबरांत आशियायी खेळां सर्तींत निमाणे खेपे वांटो घेतिल्लो. थंय तिका दुखापत जाल्ली. तिका सर्वोच्च कामगिरी करपाक जमूंक नासली तरी पांच खेपे वजन उखलतना तिणें कसलीच चूक करूंक ना.

स्नॅच आनी क्लीन अॅण्ड जर्कांत तिच्या सर्वोच्च कामगिरीच्या लागी लेगीत ती पावंक ना. स्नॅचांत 29 वर्सां पिरायेचे मीराबाईची 88 कील वजनाची सर्वोच्च कामगिरी आसा. जाल्यार तिणें 2021त आशियायी चॅम्पियनशिपींत क्लीन अॅण्ड जर्कांत 119 कील वजन उखलपाचो संवसारीक विक्रम आशिल्लो. पूण, ती सध्या दुखापतींतल्यान बरी जाता ताका लागून तिका म्हणपा सारकें प्रदर्शन करपाक जमूंक ना.

पॅरीस ऑलिम्पिकाक पात्र जावपी मीराबाई ही भारताची एकोडी वॅटलिफ्टर आसा. तशेंच ऑलिम्पिकांत वांटो घेवपाची तिची ही तिसरी खेप थारतली.