’मिशन पॉलिटिकल रिझर्व्हेशना’ ची सरकाराक शिटकावणी

भांगरभूंय | प्रतिनिधी

मडगांव : गोंयच्या एसटी समाजाक येवपी विधानसभा वेंचणुकेंत राजकी आरक्षण मेळचे खातीर ’मिशन पॉलिटिकल रिझर्व्हेशन फॉर शेड्युल्ड ट्राइब्स ऑफ गोवा’ हे संघटणेन आक्रमक निर्णय घेतला. केंद्र सरकारा वशीं समन्वय साधून विधानसभा मतदारसंघांच्या आरक्षणाची प्रक्रिया बेगोबेग सुरू करची, हे खातीर संघटणेन गोंय सरकाराक १५ दिसांचो ’अल्टिमेटम’ दिला, नाजाल्यार सामकें खर आंदोलन करपाची शिटकावणी दिली.
मडगांवां आयोजीत पत्रकार परिशदेंत संघटणेन ही मागणी लावन धरली. ह्या वेळार अध्यक्ष अॅड. जॉन फर्नांडीस, उपासो गांवकार, गोविंद शिरोडकार आनी जोसेफ वाझ हाजीर आशिल्ले. अॅड. फर्नांडीस हांणी सांगलें, ’द रिऍडजस्टमेंट ऑफ रिप्रेझेंटेशन ऑफ शेड्युल्ड ट्राइब्स इन असेंब्ली कॉन्स्टिट्युअन्सीज ऑफ द स्टेट ऑफ गोवा क्ट, २०२५’ ह्या कायद्याला राष्ट्रपतींची संमती मेळून आनी अधिकृत राजपत्रांत प्रसिद्ध जावन आतां आठ म्हयने उलगल्यात. मात, आजूनय केंद्र सरकारान ह्या कायद्याच्या अंमलबजावणी खातीर निश्‍चीत तारीख जाहीर करूंक ना. जो मेरेन ही अधिसुचवणी येना, तो मेरेन आरक्षणाची प्रक्रिया मुखार सरपाक शकना.
फेब्रुवारी २०२७ त राज्यांतल्यो विधानसभा निवडणुको जावप अपेक्षीत आशिल्ल्यान, ताचे पयलीं जानेवारी २०२७त आचारसंहिता लागपाक शकता. अधिसुचना काडपाक कळाव जाल्यार मतदारसंघांच्या पुनर्रचणुके खातीर लागपी ३ ते ४ म्हयन्यांचो काळ पळयल्यार, येवपी वेंचणुकेंत एसटी समाज आरक्षणा पसून पयस उरपाचो भंय अॅड. फर्नांडीस हांणी उक्तायलो.
ह्या कळावाक लागून अनुसूचित जमाती समाजांत चिंतेचें वातावरण आशिल्ल्यान, सत्ताधारी पक्षांतले कांय प्रभावशाली फुडारी ह्या कायद्याची अंमलबजावणी आडावपा खातीर हेतुपुरस्सर यत्न करता असो दुबाव संघटणेन उक्तायला. एसटी समाजाचे प्राबल्य आशिल्ल्या मतदारसंघांत सध्या कांय उक्त्या प्रवर्गांतले आमदार कार्यरत आसात, तांचे कडल्यान सरकारचेर चेंपण आयिल्ल्याचो दावो गोविंद शिरोडकार हांणी केला.
राजकीय चेंपणाक लागून हें आरक्षण आडायल्यार हो अनुसूचित जमातीच्या घटनात्मक अधिकारांचेर अन्याय आसा. सरकारान बेगोबेग खर पावलां उबारून हो भंय पयस करचो, असो उलो संघटणेन मारलो. फुडले १५ दीस आरक्षणाची अधिसुचवणी काडून प्रक्रिया सुरू जावंक ना जाल्यार पुराय राज्यांतलो एसटी समाज रस्त्यार देंवून खर आंदोलन करतले, अशी स्पश्ट शिटकावणी ह्या वेळार दिली.