मिलाग्रीस सायबिणीचें फेस्त भक्तीभावान

भांगरभूंय | प्रतिनिधी

म्हापशें: म्हापशेंचे मिलाग्रीस सायबिणीचें फेस्त भक्तीभावान सोमारा मनयलें. ईस्टराच्या तिसऱ्या सोमारा हें फेस्त मनयतात. ह्या फेस्ताक गोंया वांगडाच शेजारच्या राज्यांतले भावीक व्हड संख्येन हाजेरी लायतात. केंद्रीय मंत्री श्रीपाद नायक हांणी उपसभापती ज्योशुआ जिसोझा हांचे सयत चर्चीक भेट दिवन सायबिणीचे मुर्तीचेर तेल ओंपलें.

भाविकांच्या उल्याक पावपी सायबीण म्हूण क्रिस्तांव तशेंच हिंदू आनी हेर धर्मांतल्या भाविकांक सायबिणींचेर खूब श्रद्धा आसा. फेस्ता वेळार सायबीण आनी तिचे हांडीर आशिल्ल्या येसू क्रिस्ताच्या पुतळ्याचेर भाविकांनी तेल, फुलां आनी मेणवाती ओंपल्यो. मिलाग्रीस सायबिणीच्या फेस्ता निमतान सेंट जेरॉम चर्चींत फांतोडेर 5.30 वरां सावन सांजे मेरेन प्रार्थना जाल्यो. ह्यो प्रार्थना कोंकणी आनी इंग्लिशेंतल्यान जाल्यो.

सकाळीं 10 वरांचेर फेस्ताची मुख्य प्रार्थना धर्मगुरू फा. लियोनार्डो मोरायश हांच्या मार्गदर्शना खाला जाली. ह्या वेळार सहाय्यक धर्मगुरू फा. सावियो पिंटो आनी फा. आगुस्तीन आल्फोन्सो हाजीर आशिल्ले. ते आदीं चर्चींतली मिलाग्रीस सायबीण आनी तिचे हांडी वयलो येसू क्रिस्त हांचे तकलेर क्रावन (मुकूट) घातलो. फेस्ता निमतान चर्ची वतीन पांच दीस विवीध सांस्कृतीक कार्यावळींचें आयोजन केलां. फुडले सात दीस हें फेस्त चलतलें.

चर्च वाठारांत दोनूय रस्त्यांचे कुशीक फेरी मांडल्या. तातूंत कपडे, खेळणी, मिठाय, चणे, घरगुती सजावटीचीं दुकानां आसात. म्हापशेंचो धर्मांक एकचार सांबाळपी हो एकसुरें फेस्त. आंगवणीक पावपी देवी म्हूण मिलाग्रीस सायबिणीचेर भाविकांची श्रद्धा आसा. ह्या दिसा भावीक कट्टी घेवन भीक मागतात आनी आपली आंगवण फारीक करता. मजगतीं, अंदूं पयलेच खेपे फेस्ता वेळार चर्ची वतीन फोटो आनी व्हिडियो चित्रीकरण करपाक मनाय केल्या. पत्रकारांक लेगीत हाचे पासून पयस दवरल्यात.

मिलाग्रीस- लयराई भयणी

मिलाग्रीस सायबीण ही शिरगांवचे श्री लयराई देवीची भयण म्हूण भावीक मानतात. लयराईची जात्रा अंदूं 12 मेक मनयतले. पोरूं फेस्त आनी जात्रा एकाच दिसा मनोवपाचो योग 13 वर्सांनी आयिल्लो. शिरगांवच्यान मिलाग्रीस सायबिणीक तेल जाल्यार म्हापशेंच्यान देवी लयराईक फुलां भेट दिवपाची परंपरा आसा. ही परंपरा कितल्याश्याच वर्सां सावन चलत आयल्या.