भांगरभूंय | प्रतिनिधी
खबरां संस्था
मियामीः भारताचो टॅनीस खेळगडो रोहन बोपण्णान मियामी ओपन 2024 टॅनीस सर्तीच्या दोट्टींत वस्तादपण मेळोवन इतिहास रचलो. पिरायेच्या 44 व्या वर्सा एटीपी मास्टर्स 1000 किताब जिखपी बोपण्णा सगळ्यांत जाण्टो खेळगडो थारलो. ताणे आपलोच विक्रम मोडलो जो ताणे पोरूं इंडियना वेल्साचो किताब जिखून केल्लो.
शेनवारा जाल्ले फायनलींत बोपण्णा आनी ताचो ऑस्ट्रेलियन पार्टनर मॅथ्यू ए्ब्डनान क्रोएशियाच्या इवान डोडीक आनी अमरिकेन ऑस्टिन क्रिजेसेक हे जोडयेक 6-7, 6-3, 10-16 अशें हारयलें. बोपण्णान सव्वे फावट एटीपी मास्टर्स सर्त जिखल्या. ताणे 2011 वर्सा पयले फावट पाकिस्तानाच्या एसम-उ- हक हाच्या वांगडा ही सर्त जिखल्ली. ते उपरांत ताणे 2012 वर्सा पॅरीस, 2015 वर्सा माद्रीद, 2017 वर्सा मोन्टे कार्लो आनी 2023 वर्सा इंडियन वेल्स मास्टर सर्त जिखल्ली.
एटीपी मास्टर्स जिका 2009 सावन एटीपी मास्टर्स 1000 सर्त अशें नांव दवोरिल्लें. ही 9 टॅनीस सर्तींची एक माळ आसा. तिची सुरवात 1990 वर्सा जाल्ली. ग्रँड स्लॅम उपरांत एटीपी मास्टर्स 1000 टॅनीसांतली टॉप टियर सर्त आसा. ग्रँड स्लॅम उपरांत टॅनीस रेकींगात हे सर्तींत सगल्यांत चड गुण मेळटात. ग्रँड स्लॅम जिखल्यार 2000 गुण मेळटात जाल्यार मास्टर्स जिखल्यार 1000 गुण जमा जातात.
अंदू ऑस्ट्रेलियन ओपन जिखल्ली
रोहन बोपण्णान अंदू फाटल्या जानेवारी म्हयन्यांत ऑस्ट्रेलियन ओपन सर्त जिखल्ली. तेन्ना ताची पिराय 43 वर्सांची आशिल्ली. ऑस्ट्रेलियन पार्टनर मॅथ्यू एब्डन वांगडा अंदूची पयली ग्रँड स्लॅमांत ही जोडी दोट्टींत चॅम्पियन थारल्ली. हाच्याच वांगडा बोपण्णान पयली दादल्यांची दोट्टी ग्रँड स्लॅम किताब मेळयल्लो. अशें करपी तो सगल्यांत जाण्टो खेळगडो थारल्लो.
रॉड लेवर एरिनात भारतीय- ऑस्ट्रेलियन जोडयेन इटलीच्या सिमोन बोलेली आनी एँड्रिया ववास्स्रोी जोडयेक 7-6, 7-5 अशें हारयल्लें. सुमार देड वर चलिल्ले फायनलींत बोपण्णा- एब्डनाचे वर्चस्व आशिल्लें. बोपण्णाचे कारकिर्दीतंलो हो दुसरो ग्रँड स्लॅम किताब आसा. ऑस्ट्रेलियन ओपन 2024 त रोहन बोपण्णाचो हे दुसरें ग्रँड स्लॅम टायटल आसा. ताच्या पयलीं ताणे 2017 वर्सा कॅनडांत गाब्रियल डोब्रोवस्की वांगडा फ्रेंच ओपनांत मिश्र दोट्टींचो किताब मेळयल्लो. दादल्यांच्या दोट्टींत 2010 वर्सा पाकिस्तानाच्या ऐसाम उल हक कुरेशीक वांगडा घेवंन ताणे जैत मेळयल्लें. 2023 वर्सा एब्डाना वांगडा अमेरिकन ओपन सर्तींत तो दोन फावट उपजैतिवंत थारल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
