भांगरभूंय | प्रतिनिधी
कलाकारांनी घालो रसिकांचेर मोनेळ
पणजी: आतां संगिता वरवीं उपचार ही प्रक्रिया सुरू जाल्या इतली संगितांत ताकद आसा अशें सांगून मुख्यमंत्री डॉ. प्रमोद सावंत हांणी स्वस्तीक संजीवन संगीत अकादमी, स्वरमंगेश हांच्या माध्यमांतल्यान ध्यास घेवन संगीत मळार कार्यरत आशिल्ले खातीर समाधान उक्तायलें.
स्वस्तीक आयोजीत आनी पिएनजी एक्सक्लुसिव्ह प्रतस्तूत 13 व्या मास्टर दीनानाथ मंगेशकार स्मृती स्वरमंगेश संगीत महोत्वाचें उक्तावण केले उपरांत मुख्यमंत्री मुखेल सोयरे म्हूण उलयताले.
माचयेर आमदार केदार नायक आनी संकल्प आमोणकार, कला संस्कृती संचालनालयाचे संचालक सगुण वेळीप, पिएनजीचे अभय गाडगीळ, नामनेचे गायक पंडित शौनक अभिषेकी, राजदीप बिल्डर्साचे राजेश तारककर, स्वस्तीकाचे आश्रयदाते विनयकुमार मंत्रवादी, मुखेल उलोवपी नामनेचे प्रवचनकार डॉ. संजय उपाध्ये आनी सत्कारमुर्ती समिक्षक जनार्दन वेर्लेकार हाजीर आशिल्ले.
ह्या वेळार मुख्यमंत्री डॉ. प्रमोद सावंत हांचे हस्तुकीं जनार्दन वेर्लेकार हांचो शाल, श्रीफळ सन्मान पत्र आनी भेटवस्तू दिवन भोवमान केलो. तशेंच स्वरमंगेश यादस्तिकेचें प्रकाशन केलें.
वेर्लेकार हांणी म्हणलें, हांव वेवसायान चार्टर्ड अकावंटंट आसा. भुरगेपणा सावन संगीत आयकून कानसेन आनी बरोवपी जालो. सगल्या कानसेनाचो प्रतिनिधी म्हूण हांव भोवमान स्विकारतां.
ह्या वेळार राजेश तारकार, शौनक अभिषेकी, सगुण वेळीप ह्या मानेस्तांचीं उलोवपां जालीं.
आयज पयल्या दिसा पयलीं विनायक चित्तार हांणी श्री राग वाजोवन सतारवादन जालें. तांणी झिंजोटी राग आलाप, जोड, झाला आनी गत हे वळेरेन वाजयले. तांकां पार्थसारथी मुखर्जी हांणी तबल्याचेर सांगात दिलो. दुसरी मैफल पंडित जसराज हांचें शिश्य पंडित संजीत अभ्यंकर हांणी रंगयली. तांणी यमन कल्याण आळवून सुरवात केली. मंद्र सप्तकांत तांणी भरदार आलापी करून बरें वातावरण निर्माण केलें आनी बोल आलाप, सरगम, ताना हांचो सुरेख मेळ सादलो. उपरांत तांणी रोगेश्री रागांतल्यो दोन बंदिशी पेश केल्यो. तांकां संवादिनीचेर निलय सावळी आनी तबल्याचेर मयंक बेडेकार हांणी साथ दिली. पंडित अभ्यंकर हांच्यो शिश्या मुग्धा गांवकार हांणी स्वरसाथ दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
