भांगरभूंय | प्रतिनिधी
वाळपय: श्री शांतादुर्गा कला मंच मासोड्डें, नेहरू युवा केंद्र पणजी, कला आनी संस्कृती संचालनालय पणजी आनी सम्राट क्लब वाळपय हांच्याजोड पालवान मासोड्डें सत्तरी हांगा बुधवार ता. 25 जानेवारीक लोककला महोत्सवाचें आयोजन केलां.
सांजेच्या 6 वरांचेर जावपी उक्तावण कार्यावळीचे अध्यक्ष सुवातेर गोंयचे भलायकी मंत्री तशेंच थळावे आमदार विश्वजीत राणे, मुखेल सोयरे म्हणून खेळां, कला आनी सांस्कृतीक खात्याचे मंत्री गोवींद गावडे, कला आनी सांस्कृतीक संचालयाचे संचालक सगूण वेळीप, वाळपय नगरपालिकेची नगराध्यक्ष सेहझीन शेख, सम्राट कलाम इंटरनॅशनलाचे अध्यक्ष शैलेश बोरकार, थळावी नगरसेविका प्रसन्ना गांवस हाजीर रावतलीं.
उपरांत लोककला सादर करतले. हातूंत लोककला सरस्वती कला मंडळ कुर्टी फोंडें हांचे वतीन दिवली नाच, घोडेमोडणी, विरभद्र, चपय, जागोर सादर करतले. उपरांत सालेलीच्या सिद्धेश्वर रणमाले पंगडा वतीन परंपरीक रणमाले पंगड सादर करतले.
बिरेस्तार ता. 26 जानेवारीक सांजेच्या 6 वरांचेर समारोप कार्यावळ जातली. ह्या वेळार मुखेल सोयरे म्हणून नेहरू युवा केंद्र संघटणेचे उपसंचालक कालिदास घाटवळ, पत्रकार किशोर नायक गांवकार, सर्जनशील शिक्षक, लोकसंस्कृतायेचे राखणदार संवर्धक आनी सामाजीक कार्यकर्ते झिलू गांवकर, थळावे नगरसेविका प्रसन्न गांवस हाजीर रावतले. उपरांत लोककला सादरीकरण जातलें. लक्ष्मी हरवलकार आनी वांगडी कलाकार नगरगांव हांचे वतीन दवली मांड, श्री देव भैरव जोगेश्वरी फुगडी मंडळ भैरववाडी कुडाळ हांचे वतीन फुगडी सादर जातली.
हे कार्यावळीक नागरिकांनी व्हडा संख्येन हाजीर रावचें असो उलो शांतादुर्गा कला मंच अध्यक्ष रमेश गांवस, शांतादुर्गा कला मंच सचीव कृष्णा गांवस, वाळपय सम्राट अध्यक्ष अशोक काणेकार आनी सचीव चंदन गांवस आनी कार्यावळीचे संयोजक गौरीची गांवस हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
