भांगरभूंय | प्रतिनिधी
3 पुलीस कर्मचारी सेवेंतल्यान निलंबीत
फोंडें: माशेलांत फास्ट फूड चालक विराज माशेलकार हांचेर आयतारा रातीं जाल्ल्या हल्लो प्रकरणांत समीर फडते (46, बेतकी), मितेश गाड (27, नावेली), मोहीत गाड (26, नावेली), सुप्रेश सांवड्डेंकार (31, हरवळें), विवेक देसाय (23, सांखळी) आनी अस्मीत साळुंखे (27, आमोणें) हांकां म्हाड्डोळ पुलिसांनी अटक केली. पुलीस कर्मचारी आकाश नावेलकार (27, नावेली) हाका तपासाक सगले तरेचें सहकार्य केल्ल्यान ताका पुलिसांनी 41-ए कलमा खाला नोटीस धाडल्या. प्रकरणांत वांटेकार आशिल्ल्या तीन पुलीस कर्मचाऱ्यांक सेवेंतल्यान निलंबीत केल्यात.
आयतारा रातीं 11 वरांच्या सुमाराक विराज माशेलकार हांचेर समीर फडते आनी हेर 4 जाणांनी हल्लो करून जखमी केल्लो. हेर तीग जाण फास्ट फुडाच्या भायर उबे आशिल्ले. जखमी जाल्ल्या विराज माशेलकाराक गोमॅकाँत उपचार केले उपरांत फांतोडेर 4 वरांचेर डिस्चार्ज दिल्लो.
सोमारा दनपारां जखमी जाल्ल्या विराज माशेलकारान रितसर पुलीस कागाळ दाखल केल्ली. उपरांत सगल्यांत पयलीं पुलिसांनी आकाश नावेलकार हाका ताब्यांत घेवन चवकशी केल्ली. आकाश नावेलकारान पुलिसांक दुबावितांचो सोद घेवपाक सहकार्य केल्ल्यान अटक करिनासतना पुलिसांनी ताका 41 ए कलमा खाला नोटीस धाडल्या. प्रकरणांतलो मुखेल सुत्रधार समीर फडते हाचें वरिश्ठ पुलिसां सयत राजकारण्या कडेन लागींचे संबंद आसात. त्याच राजकी संबंदाचो लाव घेवपाच्या यत्नांत समीर फडते स्वता मात आडकून पडलो.
जखमी जाल्ल्या विराज माशेलकाराक फांतोडेर 4 वरांचेर गोमॅकाँतल्यान डिस्चार्ज दिवपा खातीर राजकी चेपण हाडलें. उपरांत घरा परतले उपरांत जखमी विराज माशेलकाराची समजूत काडपाक राजकी फुडाऱ्यांनी खूबशे यत्न केले. विराज माशेलकार ज्यावेळार पुलीस कागाळ दिवपा खातीर गेलो तेन्ना लेगीत राजकी फुडाऱ्याचे कांय कार्यकर्ते ताची समजूत काडपा खातीर हजर आशिल्ले. पूण विराज माशेलकारान राजकी चेपणाक बळी पडनासतना पुलिशेंत कागाळ दिली.
मजगतीं, हवालदार समीर फडते, घुुंवळे वखदां विरोधी पंगडाचो कर्मचारी आकाश नावेलकार आनी भारतीय राखीव पुलीस दळाचो कर्मचारी मितेश गाड हांकां निलंबीत केल्यात. वरिश्ठ पुलीस अधिक्षक बॉसुएट सिल्हा हांणी तसो आदेश जारी केला. हाचे पयलीं मार्च 2022 वर्सा पोरणें गोंय पुलीस स्टेशनार मारपेट केल्ल्या प्रकरणांत समीर फडतेक निलंबीत केल्लो.
माशेल हल्ल्यांतलो मुखेल सुत्रधार समीर फडते हो फोंडें पुलीस स्टेशनार हवालदार म्हूण काम करता. पूण हल्लो करपाच्या कांय दिसां पयलीं सावन ताणें 45 दीस रजा घेतिल्ली. ताका लागून विराज माशेलकाराचेर हल्लो करपाच्या हेतान ताणें रजा घेतिल्ल्याचो दुबाव उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
