भांगरभूंय | प्रतिनिधी
पणजी ः माशेल महिला सहकारी सोसायटीच्या संचालक मंडळान सुमार रु. 18 कोटींची फटवणूक केल्ल्याचो आरोप ठेवीदारांनी केला. आज आझाद मैदानाचेर 50 ठेवीदार जमले आनी मुख्यमंत्री डॉ. प्रमोद सावंत हांणी हांतूत लक्ष घालून ठेवीदारांचे पयशे मेळोवन दिवचे अशी मागणी तांणी केली.
2016 वर्सा सावन 62 ठेवीदारांनी सोसायटींत पयशे गुंतयल्ले. सुरवेक व्याज वेळार मेळटालें. पूण कोविडाक लागून सोसायटीन 2019 वर्सा उपरांत व्याज दिवप बंद केलें. ह्या वेळार संचालक मंडळान आमकां टप्प्या टप्प्यान ठेवी परत करपाचें आश्वासन दिल्लें. पूण, चार वर्सांत कोणाकूच पयशे मेळूंक नात. पयशे हाडपा खातीर दीसभर वाट पळोवन फकत शंबर रुपया दिवन परत धाडपाचींय प्रकरणां घडल्यांत, अशें ठेवीदार सिंथीया गोम्स हांणी सांगलें.
कांय ठेवीदारांनी आपल्या पेन्शनाचे पयशे सोसायटींत दवरल्यात. कांय ठेवीदार ज्येश्ठ नागरिक आसात. तांणी पुराय आयुश्याची कमाय सोसायटींत दवरल्या. पूण, स्वताचें वखद घेवपा खातीर लेगीत तांकां हेरां कडल्यान पयशे घेवचे पडटात. सोसायटीन दिल्लें रिणाचें रक्कम चड आसा, अशें म्हण्टात. पूण आमकां मेळिल्ले म्हायती प्रमाण, ही रक्कम 25 लाख आसा, अशें गोम्सान सांगलें.
जेन्ना रिणाची रक्कम 25 लाख आनी डिपॉझिट 18 कोटी आसता तेन्ना रिणाचे रकमेक लागून पयशे दिवंक मेळनात, हें कारण योग्य न्हय. संचालक मंडळान ठेवीदारांच्या पयशांचो उपेग स्वता खातीर केला. तांचे आड कारवाय करपाची गरज आसा. फुडल्या एका म्हयन्यांत सरकारान ठेवीदारांचे पयशे संचालक मंडळा कडल्यान वसूल करचे, अशी मागणी गोम्सान केल्या.
मजगतीं, संचालक मंडळांतल्या एका मनशाचे इलॅक्ट्रॉनिक्स दुकान आसा. अजापाची गजाल म्हळ्यार ताणें सोसायटींतल्यान रीण घेवन स्वताच्याच दुकानांतल्यान टीव्ही, फ्रिज, वॉशिंग मशीन विकतें घेतलां आनी सोसायटीनय ताका मान्यताय दिल्या अशीय म्हायती सिंथिया गोम्सान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
