माशेलांत पादचाऱ्याक मोटारीचो धपको बसून गंभीर जखमी

भांगरभूंय | प्रतिनिधी

मोटार उदका पायपलायनीचेर पडून लंवडली व्हाळांत

माशेल: माशेलांतल्या गोवा बागायतदार मार्केटा मुखार हुंडाय (जीए 08 के 2410) मोटारीच्या ड्रायव्हरान चलत वचपी मनशाक आनी रस्त्याचे कुशीक पार्क करून दवरिल्ले स्कुटरीक नेटाचो धपको दिलो. ह्या धपक्यान चलत वचपी प्रकाश जल्मी (58, मडकय) गंभीर रितीन जखमी जालो आनी मोटार स्कुटरी सयत लागींच आशिल्ल्या तीन मिटर खोल आशिल्ल्या व्हाळांत लंवडली. स्कुटर त्या मोटारी सकयल आडकून पडली आनी सुदैवान प्रकाश जल्मी रस्त्यार शेवटलो. मोटार उदकाचे पायपलायनीचेर पडिल्ल्यान पायपलान फुटून सगले उदक व्हाळांत व्हांवतालें.

मोटारींत ड्रायव्हरा सयत दोन कामगार आडकून पडिल्ले तांकां लोकांनी भायर काडले. सुदैवान जिवीतहानी मात जावंक ना. प्रकाश जल्मी आनी मोटार चालक उदय लक्ष्मण लोलयेंकार (61, तिवरें) हांकां रोगडेच 108 एम्बुलन्सींतल्यान उपचारा खातीर बेतकी भलायकी केंद्रांत दाखल केले. प्रकाश जल्मी हांचे तकलेक आनी पांयाक खर मार बशिल्ल्यान तांकां रोखडेच भलायकी केंद्रांतल्यान बांबोळे गोमॅकाँत फुडल्या उपचारा खातीर दाखल केलो.

मजगतीं, म्हाड्डोळ पुलीस स्टेशनाचे हवालदार आनंद गावडे हांणी रोखडीच अपघात थळार धांव घेवन पंचनामो केलो.

सविस्तर म्हायती प्रमाण हुंदाय मोटार आमोणें सावन माशेलाचे दिशेन येता आसतना गोवा बागायतदारा मुखार मोटार थांबोवपाचो यत्न करीत आसतना चालकाचो पांय चुकून एक्सलेटराचेर पडलो आसुये असो दुबाव लोक उक्तायताले. मेळिल्ले म्हायती प्रमाण थंय एक बायल सद्दां सुकें नुस्तें घेवन रस्त्यार विक्रे खातीर बसताली. पूण अपघाता वेळार थंय जर ती आशिल्ली जाल्यार अनर्थ घडटलो आशिल्लो अशे थळावे लोक चर्चा करताले.

तशेंच थंयच्या जंक्शनाचेर प्रवाशी रिक्षा, पोदेर आपल्यो साकयली पार्क करून रावतात. तशेंच आंबे आनी भाजी विक्रेते मेळत थंय मुखेल बाजारांत पार्किंगेचे सुवातेर विक्रे खातीर येवन बसतात. तांकां एकूच सुवात म्हणून ना. हाका लागून पार्कींग करपाक लोकांक त्रास जाता आनी सदांच मुखेल बाजारांत येरादारीची कोंयडी जायत आसता अशें लोक उलयतना दिसून आयलें.

आमी फळां, भाजी आनी आंबे विक्रेत्यांक मार्केटांत सुवात नेमून दिल्या. पूण हे विक्रेते मेळत थंय बसतात. कोणाचेच आयकनात. पंचायतीन हे संबंदी वेळावेळार येरादारी पुलीस आनी म्हाड्डोळ पुलीस स्टेशनार लेखी कागाळ दिल्या. पूण पुलीस अशे अपघात जाले उपरांतूच कारवाय करतना दिसतात. तरी पुलिसांनीच तांचेर खर कारवाय करची अशी आमची मागणी आसा अशें सरपंच जयेश नायक हांणी सांगलें.