भांगरभूंय | प्रतिनिधी
माशेल, प्रतिनिधी: माशेलांतल्या बाप्पा मेडिकला सामकार उदका खात्याचे वाल्व आसात. तांचेर धांपण ना. ताका लागून ते दोनूय वाल्व उक्तेच आसा. हांगा सांतईस्तेव्ह, आखाडो, आमयेवाडो, कुरडुंव- खांडोळ्यां, तशेंच टोंक- सारमानशेर वचपी प्रवासी बशी खातीर रावतात. ह्या दिसांनी पडपी पावसांत ते धांकण नाशिल्ले वाल्व चड धोक्याचे जाल्यात. ताका लागून प्रवासी आनी नागरीक ते बेगीन धांपचे अशी मागणी करतात.
वाल्व उक्तेच आशिल्ल्याची उदका कर्मचार्यांक जायते फावट सांगून लेगीत हाचे कडेन आडनदर जाता. हांगा बशी, केन्ना दुचाकी, चारचाकी वाहनांय येवन रावतात. ताका लागून ह्या उक्त्या वाल्वांचो अदमास येना. रातच्या वेळार तर हें सामकें धोक्याचें जालां. ताका लागून ते धांपपाची गरज आसा.
फुडाराक हांगा कितेंय वायट घडणूक घडचें पयलीं उदका पुरवण खात्यान हाचे कडेन लक्ष दिवचें. तशेंच हें वाल्व धांपचें, अशी मागणी नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
